काठमाडौं । यातायात व्यवस्था विभागले ट्राफिक नियममा थप कडाई गर्ने भएको छ । जथाभावी सवारी कुदाउने गर्दा जाम र दुर्घटना बढेपछि विभागले ट्राफिकको सुझावका आधारमा जरिवाना शुल्क बढाउन लागेको हो । ट्राफिक नियम उल्लंघन गर्नेलाई न्यूनतम ५ हजार रुपैयाँ जरिवाना गर्ने प्रस्ताव गरेको छ । संघीय सवारी तथा यातायात व्यवस्था ऐनको मस्यौदामा यो कुरा उल्लेख गरिएको विभागका महानिर्देशक गोगनबहादुर हमालले जानकारी दिए ।
‘ऐनको मस्यौदामा हामीले ट्राफिक नियम उल्लंघन गर्नेलाई ५ हजार जरिवानाको प्रस्ताव गर्दैछौं,’ उनले भने ‘अहिले जरिवाना थोरै छ त्यही भएर लापरबाही बढीरहेको छ । त्यसकारण जरिवाना बढाउन लागेका हौँ ।’ अहिले ट्राफिक नियम उल्लंघन गरे ट्राफिक प्रहरीले कसुर हेरेर ५ सय देखि १५ सयसम्म जरिवाना लिने गरेको छ । विभागले हाल प्रस्तावमात्र गरेकाले यसले अन्तिम रूप भने पाएको छैन । प्रस्तावका विषयमा विभागले प्रदेश सरकारसँग पनि छलफल गर्ने भएको छ । यसैगरी सवारी चालक अनुमतिपत्र (लाइसेन्स) दिँदा पनि तीन महिना अनिवार्य सडकमै ट्रायल दिनुपर्ने व्यवस्था गर्न लागेको छ ।
यही विषयमा विभागले आइतबार र सोमबार प्रदेश सरकारसँग छलफल गर्दैछ । ‘प्रदेश सरकारसँग छलफलपछि हामी ऐनको ड्राफ्ट भौतिक पूर्वाधार तथा यातायात मन्त्रालयमा पठाउँछौँ’, हमालले भने, ‘मन्त्रालयले सम्बन्धित मन्त्रालय र स्टेक होल्डरहरूसँग राय तथा सुझाव लिन्छ । त्यसपछि मस्यौदा संसद्मा जान्छ ।’ संसद्ले अनुमोदन गरेपछि मात्र ऐन लागू हुन्छ । यसैगरी विभागले ट्याक्सीको लागि ‘हाउमच’ अभियानमा भने ट्राफिकलाई ३ हजारसम्मको जरिवाना लिने अधिकार दिइएको छ । यो ऐन लागू भए लेनक्रस, ओभर स्पिड, जिकज्याक लगायतका सामान्य कसुरमा ५ हजार जरिवाना लगाउन पाउने छ ।
‘यो ऐन लागू भएपछि ट्राफिक नियम उलंघनको जरिवाना न्यूनतम र उच्चतम भन्ने हट्छ र सीधै ५ हजार जरिवाना लाग्छ’, हमालले भने । विभागले सवारी चालक अनुमति लिने व्यवस्था नै परिवर्तन गर्न लागेको छ । सार्वजनिक सवारीसाधन चलाउनका लागि दिइने सवारी चालक अनुमतिपत्र (लाइसेन्स) को लिखित र प्रयोगात्मक दुवै परीक्षा परिवर्तन गर्ने भएको हो । चालकलाई थप जिम्मेवार बनाउनका लागि सुरुदेखि नै कडाई गर्ने योजनामा विभाग लागेको छ । हमालले लिखित परीक्षामा निश्चित समयको कोर्स नै राख्न लागिएको बताए ।
अहिले तीन महिनाको कोर्स राख्न प्रस्ताव गर्न लागिएको छ । त्यसमा सवारीसाधनको यान्त्रिक अवस्था, सवारीसाधनसँग जोडिने विषय, यात्रुसँग गर्ने व्यवहारलगायत समावेश हुनेछ । कोर्स पढेर लिखित परीक्षा दिनुपर्नेछ । लिखित परीक्षा पास गरेपछि बल्ल ट्रायल दिन सकिनेछ । प्रयोगात्मक परीक्षा पनि अहिलेको भन्दा फरक हुनेछ । अब प्रयोगात्मक परीक्षामा अहिलेको जस्तो सामान्य ट्रायलको व्यवस्था गरिएको छैन ।
ऐनमा विदेशमा जस्तो फिल्डमै गएर परीक्षा दिनुपर्ने व्यवस्था राख्न लागिएको छ । उनका अनुसार फिल्डमा गरिने टेस्ट पासपछि पनि लाइसेन्स पाउनका लागि ६ महिना ट्रायल अवधि राखिनेछ । यो अवधिमा सवारीसाधन सञ्चालन गरेको रिपोर्ट कार्ड राम्रो भए मात्रै लाइसेन्स पाइनेछ । रिपोर्ट कार्ड राम्रो नभए पुनः ट्रायल अवधि थपिनेछ । तीन महिनाको पुनः ट्रायल अवधि थप्ने प्रस्ताव गर्न लागिएको छ । सौर्य दैनिकबाट
