काठमाडौँ । प्रधानमन्त्री केपी शर्मा ओलीलाई करिब १० दिन त्रिवि शिक्षण अस्पतालको लिभर ट्रान्सप्लान्ट आईसीयूमा राखिने भएको छ । धपेडी नहुने र सुरक्षितसाथ उच्च चिकित्सकीय निगरानीमा बस्ने वातावरण हुने भएकाले प्रधानमन्त्रीको अस्पताल बसाइ लम्ब्याउने मनस्थितिमा उपचारमा संलग्न चिकित्सकहरू रहेका हुन् ।
६९ वर्षीय प्रधानमन्त्री ओलीलाई शुक्रबार आईसीयूमा हिँडडुल गराइएको थियो । भात र मासुको झोल दिइएको छ । बिहान उनले चिया–बिस्कुट खाएका थिए । यस्तो शल्यक्रियामा नियमित प्रक्रियाअन्तर्गत नै बिरामीलाई हिँडडुल गराइन्छ । ‘यही गतिमा सुधार हुँदै गयो भने ७ देखि १० दिनसम्ममा उहाँलाई डिस्चार्ज गर्छौं,’ प्रधानामन्त्रीकी निजी चिकित्सक प्रा,डा. दिव्यासिंह शाहले भनिन्, ‘उहाँको स्वास्थ्य स्थिति ठीक छ । स्थिर छ ।’ प्रधानमन्त्रीको शरीरले मिर्गौला प्रत्यारोपणपछिको शरीरले देखाएको प्रतिक्रिया र सुधारको गति सन्तोषजनक रहेको डा, शाहले बताइन् ।
प्रधानमन्त्री ओलीले शल्यक्रियापछि पहिलो पटक शुक्रबार चिकित्साकर्मीबाहेकका सँग फोनमा कुराकानीसमेत गरेका छन् । डा. शाहले नै आफ्नो फोनमा प्रधानमन्त्री र प्रमुख राजनीतिक सल्लाहकार विष्णु रिमालबीच कुराकानी गराएकी थिइन् । करिब दुई मिनेटको कुराकानीमा प्रधानमन्त्रीले आफूलाई ठीक रहेको जानकारी दिँदै आफू छिट्टै काममा फर्किने बताएका थिए । अस्पतालमा भएको बिरामीको प्रोटोकलअनुसार प्रधानमन्त्री ओलीलाई हाल मोबाइल फोन दिइएको छैन । बिरामीले के गर्ने के नगर्ने प्रोटोकललाई प्रधानमन्त्री ओलीले समेत पालना गरिरहेको डा. शाहले बताइन् ।
करिब ३ महिनाअघि एपेन्डिसाइटिसको शल्यक्रिया हुँदा समेत प्रधानमन्त्रीलाई थप केही दिन आइसोलेसन सरहको स्थितिमा मनमोहन कार्डियोथोरासिक भास्कुलर र ट्रान्सप्लान्ट सेन्टरको आईसीयूमा राखिएको थियो । यसले उनमा सुधारको गति बढेको थियो ।
हाल प्रधानमन्त्री अन्य बिरामीभन्दा पृथक् अत्याधुनिक आईसीयूमा भएकाले अस्पताल बसाइ अलि लम्ब्याउँदा अस्पतालजन्य संक्रमणको जोखिम नरहने चिकित्सकले बताएका छन् । प्रधानमन्त्रीलाई दुखाइनाशक औषधि बन्द गरिएको छ । प्रत्यारोपणको दिन बुधबार उच्च मात्रामा दिइएको दुखाइनाशक औषधिमा कमी ल्याउँदै तेस्रो दिन बन्द गरिएको हो ।
संक्रमण नियन्त्रण रणनीतिअन्तर्गत प्रधानमन्त्री ओलीलाई हालै बनाइएको परिष्कृत ‘लिभर ट्रान्सप्लान्ट’ आईसीयूमा राखिएको छ । मिर्गौला प्रत्यारोपण भएका बिरामीलाई ‘रेनल ट्रान्सप्लान्ट युनिट’ मा राख्ने गरिन्छ । ‘जबसम्म हाम्रा चिकित्सक विश्वस्त हुँदैनन्, तबसम्म प्रधानमन्त्रीलाई आईसीयूमै राखिन्छ,’ अस्पतालका कार्यकारी निर्देशक प्रा.डा. प्रेमकृष्ण खड्गाले भने, ‘यो आइसोलेसन जस्तै भएकाले अस्पतालजन्य संक्रमणको सम्भावना अत्यन्त न्यून छ ।’ अस्पतालले प्रधानमन्त्रीका सबै महत्त्वपूर्ण सूचक सामान्य अवस्थामा रहेको समेत जनाएको छ ।
एक चिकित्सकका अनुसार प्रधानमन्त्रीको मिर्गौलाले पिसाब बनाउने मात्रासमेत अपेक्षित नै देखिएको छ । हाल प्रतिघण्टा २०० देखि २५० मिलिलिटर पिसाब बनिरहेको छ । उनको सामान्य अवस्थाको रक्तचाप माथि १५० र तल ६० देखि ८० रहने गरेको छ । उनको अक्सिजनको सेचुरेसन ९४र९५ प्रतिशत छ । करिब आठ महिनादेखि ओली मिर्गौलाको समस्यासम्बन्धी विभिन्न परीक्षणसँगै उपचार प्रक्रियामा थिए ।, समाचार कान्तिपुर दैनिकमा प्रकाशित छ ।