काठमाडौं । पूर्वराजा ज्ञानेन्द्र शाहले पृथ्वी जयन्तीको पूर्वसन्ध्यामा जनइच्छा र प्रगतिसँग सरोकार नराख्ने जुनसुकै तन्त्र निरर्थक हुने बताउनुभएको छ । उहाँले एक सन्देश जारी गर्दै राष्ट्रको कीर्ति र जनताको सुखबाहेक प्रजातन्त्रको कुनै लक्ष्य हुन नसक्ने धारणा व्यक्त गर्नुभएको हो ।
‘राष्ट्रियताका आधारहरु माथी प्रहार भई देशको अस्तित्व समेत संकटमा पारेको यस स्थितिमा एकताको महत्व र वडामहाराजाधिराजका योगदान एवं दिव्य उपदेशको सान्दर्भिकता थप बढेको महशुस हामीले गरेका छौं । राष्ट्रनिर्माताबाट परराष्ट्र मामिलाका नीति र व्यवहारको सम्वेदनशिलतालाई सदैव आत्मसाथ गरिरहनु पर्ने सन्देश तथा दिव्य उपदेशका उपेक्षाका कारण यतिबेला हामी असन्तुलनको परिणाम व्यहोर्दै छौं। देश परायाहरुको खेल मैदान बनिसकेको खतराको अनुभूति हरेक नेपालीले गरिराखेका छन् ।’ उहाँले सन्देशमा भन्नुभएको छ ।
राष्ट्रियता सुदृढ राख्दै समग्र राष्ट्रलाई सिंगारौं भन्ने नेपालीको आजको आकांक्षा र आवश्यकता रहेको उहाँको भनाई छ ।
