काठमाडौं । इन्डियन प्रिमियर लिग (आईपीएल) यूएईमा हुने भएको छ । आईपीएल गभर्निङ काउन्सिलको बैठकले भारत सरकारबाट अनुमति पाउने निश्चित भएपछि खेल सेप्टेम्बर १९ बाट युएईमा गर्ने निर्णय गरेको हो।
आगामी १९ सेप्टेम्बरबाट तय भएको आईपीएल प्रतियोगिताका ५३ खेलहरु दुबई, शारजाह र अबुधावीमा खेलाइनेछ । प्रतियोगिताको फाइनल खेल १० नोभेम्बरमा हुने तय भएको छ ।
त्यस्तै, आइपीएलको प्लेअफको हप्तामा तीन टोली सम्मिलित महिला टी–२० च्यालेन्जको पनि आयोजना गरिनेछ । यद्यपि, अस्ट्रेलियाका विकेट किपर एलिसा हेलीलगायत थुप्रै शीर्ष महिला क्रिकेटरहरुले प्रतियोगिताको समयको आलोचना गरेका छन् ।
अस्ट्रेलियामा १६ अक्टोबरदेखि शुरु हुने महिला बिग ब्यास लिगसँग यस प्रतियोगितालाई जुधाइएको छ । चुनावका कारण सन् २०१४ मा पनि यूएईमा आईपीएलको आयोजना गरिएको थियो ।
