काठमाडौं । टोकियो सिटी युनिभर्सिटीमा अध्ययनरत नेपाली छात्रा सुप्रिया खड्काले त्यस विश्वविद्यालयको प्रतिष्ठित “प्रेसिडेन्ट अवार्ड” प्राप्त गर्नु भएको छ ।
उहाँ सहित अरु चार जना जापानी विद्यार्थी पनि यो अवार्डबाट सम्मानित भएका थिए । विश्वविद्यालयले हालै आयोजना गरेको एक कार्यक्रममा पुरस्कृत सबै विद्यार्थीलाई अवार्ड प्रदान गरिएको थियो ।
सुप्रिया खड्काले सन् २०२४ मा अनुसन्धानात्मक लेखहरु प्रकाशन गरेवापत यो पुरस्कार प्राप्त गर्नु भएको हो । विश्वविद्यालयको मूल्याँकन समितिले कूल १३ वटा अनुसन्धानात्मक लेखहरुलाई मूल्याँकन गरी सुप्रियालाई प्रेसिडेन्ट अवार्डका लागि मनोनयन गरेको थियो ।
अवार्ड जितेपछि उहाँले एक जापानी अनलाइनलाई संक्षिप्त प्रतिक्रिया दिँदै भन्नुभएको छ, “एक वर्षको अवधिमा विद्यार्थीहरुले प्रकाशन गरेका अनुसन्धानात्मक लेखहरुको मूल्याँकनका आधारमा यो पुरस्कार दिइन्छ । मेरो रिसर्च पेपरको मूल्याँकनका आधारमा विश्वविद्यालयले मलाई पुरस्कृत गरेको हो, म निकै खुसी छु ।”
सुप्रियाले तापक्रम, आद्रता, वायुप्रवाहका कारण सिर्जना हुने थर्मल वातावरण समेतका हिटिङसँग सम्बन्धित विषयमा अनुसन्धान गरेर जर्नलहरुमा लेख प्रकाशन गर्नुभएको छ ।
आफू पुरस्कृत हुनुमा परिवारको हौसला र विश्वविद्यालयका प्रोफेसरहरुबाट प्राप्त उत्प्रेरणा नै मुख्य रहेको पनि उहाँले बताउनुभयो । सुप्रिया अहिले विद्यावारिधि तहमा अध्ययनरत हुनुहुन्छ ।
जापानी विश्वविद्यालयहरुमा अहिले निकै ठूलो संख्यामा नेपाली विद्यार्थीहरुले अध्ययन गरिरहेका छन् ।
