झापा। जैविक विविधताले भरिपूर्ण जलथल वनहरूमा एक सय ५५ प्रजातिका रुख फेलापरेका छन् ।
वनस्पतिविद् डा लीलानाथ शर्माले जिल्लाको कचनकवल, बाह्रदशी, हल्दिबारी गाउँपालिका र भद्रपुर नगरपालिकासम्म फैलिएका २२ वटा सामुदायिक वन क्षेत्रमा नेपालमा पाइनेमध्ये २५ प्रतिशत विभिन्न प्रजातिका रुख भेटिएका बताए ।
अध्ययनका क्रममा नेपालमा पाइने सात सय रुखमध्ये यहाँ एक सय ५५ प्रजाति पाइएका उनले जानकारी दिए। फरेस्ट एक्सन नेपालको नेतृत्वमा यहाँका वनमा पाइने विविधताको अध्ययन गरिएको थियो । चारकोशे जङ्गलको फडानी हुनबाट बचेको एक खण्ड जलथल वन छ हजार एक सय हेक्टर क्षेत्रफलमा फैलिएको छ ।
शर्मालगायत डा भाष्कर अधिकारी, योगेन्द्रविक्रम पौडेलले गरेको यस अध्ययनबारे भारतबाट प्रकाशित हुने ‘प्लियोने’ नामक विधागत जर्नलको पछिल्लो अङ्कमा प्रकाशन गरिएको छ । डा शर्माले भने “जलथल वनका रुखबारे लगभग अभिलेख पूरा भएको छ तर पनि थप अध्ययन गर्ने क्रम जारी छ ।
अन्य प्रजाति पनि थप हुने सम्भावनालाई नर्कान मिल्दैन ।” नेपालको कुल वनक्षेत्रको शून्य दशमलव एक प्रतिशत भूभाग ओगटेको जलथलले वन क्षेत्रमा यति धेरै रुखका प्रजाति भेटिँदा र त्यसको प्रचार हुँदा यहाँको जैविक विविधता संरक्षणमा सबैको चासो जानेसमेत उनको बुझाइ छ ।
“देशभरमा तुलतात्मक अध्ययन गर्ने होभने रुखहरूको प्रजातीय विविधताको दृष्टिकोणले जलथल नेपालकै सबैभन्दा धनी क्षेत्र हुनसक्ने अवस्था छ । जलथलमा लटहर, थाकल, लाली, पाँचफल, हार्पुलिया आदिजस्ता दक्षिणपूर्वी एसियामा प्रचुर मात्रामा पाइने रुखका प्रजातिहरू पनि पाइएका छन् ।
