एजेन्सी । भारतको पञ्जाबस्थित भटिन्डामा एउटा कुखुराले यस्तो भिआईपी सेक्युरिटी पाएको छ कि सुनेर तपाई हाँस्नुहुनेछ । हो, प्रहरीले यो कुखुराको ज्यान कुखुराको झगडाबाट जोगाएको छ, र त्यसमाथि अहिले चौबिसै घण्टा प्रहरीको पहरा रहेको छ ।
वास्तवमा, यो घटना गाउँमा केही मानिसहरूले ‘भाले लडाईँ’ आयोजना गर्दा सुरु भएको थियो । प्रहरीले त्यहाँ पुगेर कुखुरालाई बचायो । अहिले प्रहरीले उसको हेरचाह गरिरहेको छ । यो खबर सामाजिक सञ्जालमा भाइरल भइरहेको छ र मानिसहरूले प्रहरीको राम्रो हृदयको प्रशंसा गरिरहेका छन् ।
‘कक फाइटिङ’ एक गैरकानूनी र क्रूर अभ्यास हो जसमा दुई भाले एक अर्कासँग लड्न बाध्य हुन्छन् ।
लडाईमा भाले गम्भीर घाइते हुन्छन् र कहिलेकाहीँ मर्छन् । यस क्रममा प्रहरीले गाउँमा कुखुराको झगडा भइरहेको जानकारी पाएको थियो । प्रहरीले घटनास्थलमा पुगेर झगडा रोकेर कुखुरालाई बचाएको थियो । कुखुरालाई अहिले प्रहरी संरक्षणमा राखिएको छ ।
भटिन्डा जिल्लाको बल्लुआना गाउँमा भएको यस घटनाको बारेमा कुरा गर्दै प्रहरी अधिकारी निर्मल सिंहले गाउँमा करिब २०० जनाले भाले लडाई आयोजना गरिरहेको बताए । यसबारेमा जानकारी पाएलगत्तै प्रहरी त्यहाँ पुगे । कुखुराको लडाइँ आयोजना गर्नेहरू त्यहाँबाट भाग्न सफल भए पनि प्रहरीले दुईवटा भाले र एक जनालाई समातेको छ ।
