काठमाडौं । लाइफ इन्स्योरेन्स कर्पोरेशन नेपाल (एलआईसी नेपाल) को १८औं वार्षिक साधारण सभा (एजीएम) आज सम्पन्न भएको छ । साधारण सभाले आव २०७५/७६ को वासलात र आयव्यय विवरणलाई अनुमोदन गर्दै कम्पनीको मुनाफाबाट शेयरधनीहरुलाई चुक्ता पूँजीको १०.५३ प्रतिशत लाभांश पारित गरेको हो ।
लाभांश पारित अन्तर्गत १० प्रतिशत बोनस शेयर र बोनस शेयरको कर प्रयोजनार्थ ०.५३ प्रतिशत नगद लाभांश पारित भएको छ । आव २०७५/७६ मा कम्पनीले १,८९,३२० नयाँ बीमालेखहरु बिक्री गरी प्रथम बीमा शुल्क आम्दानी बापत रु. ४२२.८३ करोड संकलन गर्न सफल भएको थियो ।
२०७६ आषाढ मसान्तसम्ममा यस कम्पनीमा सक्रिय बीमालेखहरुको संख्या ७,३५,७४५ र कूल जीवन बीमा कोषमा रु. ५३८७.७३ करोड संकलन भएको छ । आव २०७५/७६ मा कम्पनीको कूल जीवन बीमा कोषमा २७.४८ प्रतिशत, प्रथम बीमा शूल्क आर्जनमा ४६.३६ प्रतिशत, बीमालेख संख्यामा ४२.०९ प्रतिशत, लगानीतर्फ २३.६५ प्रतिशत र लगानीबाट प्राप्त आम्दानीमा २१.९२ प्रतिशतको बृद्धिदर रहेको थियो ।
उक्त साधारण सभाले सर्वसाधारण शेयरधनीको प्रतिनिधित्व गर्ने एकजना पब्लिक डाइरेक्टरमा श्रीमती कोमल अग्रवाललाई निर्विरोध चयन गरेको छ । यस सभामा अन्य संचालकहरु मुकेशकुमार गुप्ता, अशोककुमार अग्रवाल, कुमारकेशर विष्ट, भिके कुक्रेजा र प्रमुख कार्यकारी अधिकृत लक्ष्मीप्रसाद (एलपी) दासको उपस्थित रहेको थियो ।
कम्पनीका अध्यक्ष एमआर कुमारले एलआईसी नेपालको १९औं (आव २०७६/७७० वार्षिक साधारण सभा पनि चाँडो सम्पन्न गरिने बताउँनु भयो । साथै आव २०७६/७७ मा कोभिड १९ महामारीले व्यवसायमा असर गरेको बताउनुभयो।
चालु आव २०७७/७८ को दोस्रो त्रैमासभित्र कम्पनीले राम्रो गरिरहेको बताउदै प्रथम बीमा शुल्क आर्जनमा २०.२४ प्रतिशतको बृद्धिदरका साथ कूल बीमा शुल्क आर्जन रु. ९६१.१८ करोड आर्जन गरेको र कम्पनीको कूल जीवन बीमा कोषमा रु. ७,४२४.४९ जम्मा गर्न सफल भएको समेत जानकारी गराउनुभयो ।
