पोखरा । गण्डकी प्रदेशका नवनियुक्त मुख्यमन्त्री कृष्णचन्द्र नेपाली पोखरेलले विश्वासको मत लिने भएका छन् । उनले विश्वासको मत लिने सूचना संसदलाई जानकारी गराएका हुन् ।
मुख्यमन्त्री स्रोतका अनुसार उनले असार ४ गते नै विश्वासको मत लिने तयारी थालेका छन् । संविधानको प्रावधान अनुसार विश्वासको मत लिनुभन्दा दुई दिन अघि संसदलाई सरकारले जानकारी दिनुपर्छ भने मुख्यमन्त्रीमा नियुक्त भएपछि ३० दिनभित्र विश्वासको मत लिनुपर्ने प्रावधान छ ।
बजेट लगायतका काम र मन्त्रालय विभाजनमा समेत अन्योल भएपछि विश्वासको मत छिटै लिन लागिएको गण्डकी सरकारका प्रवक्ता कुमार खड्काले जानकारी दिए ।
सरकारले विश्वासको मत लिएपछि मात्रै मन्त्रीहरुको कार्यविभाजन र बिस्तार गर्ने मुख्यमन्त्री पोखरेलको तयारी छ ।
