काठमाडौँ । काठमाडौँ महानगरपालिकाले आज इन्द्र जात्राको व्यवस्थापनमा खटिने ३ सय जनालाई कोविड विरुद्धको खोप भेरोसेलको पहिलो मात्रा दिएको छ । काठमाडौँको मजिपाटस्थित लाखे ननीमा खोप कार्यक्रम चलाइएको हो ।
इन्द्रजात्रा नेपालको राष्ट्रिय पर्व हो । यसको पहिचान अन्तरराष्ट्रिय स्तरमा पनि छ । खोप कार्यक्रममा बोल्दै महानगरका प्रमुख विद्यासुन्दर शाक्यले, महामारीबाट आफू बचेर परम्परा बचाउने प्रयासका लागि खोप कार्यक्रम सञ्चालन गरिएको उल्लेख गर्नुभयो । ‘विश्वव्यापी महामारीका रुपमा फैलिएको कोविडको जोखिमलाई कम ठान्नु हुँदैन । अर्कोतिर हामीले पुस्तौँदेखि मनाउँदै आएका पर्वहरुलाई नियमित गर्नु पर्ने छ । जात्रालाई निरन्तरता दिने क्रममा महामारीको जोखिम कम गराउन काठमाडौँ महानगरपालिकाले वहन गर्नु पर्ने सबै दायित्व पूरा गर्नेछ ।’ प्रमुख शाक्यको भनाइ थियो ।
खोपसहित जात्रा सञ्चालनका लागि माग हुने मास्क, पञ्जा, स्यानिटाइजरसहित स्वास्थ्य सुरक्षा सामाग्री उपलब्ध गराउने योजना छ । महानगरको जनस्वास्थ्य विभागका प्रमुख हरिबहादुर कुँवरले, सचेतनाका लागि स्वास्थ्य शिविर सञ्चालन गरिने जानकारी दिनुभयो ।
यस अघिको खोप कार्यक्रममा छुटेका इन्द्रजात्राको व्यवस्थापन नलागी नहुनेहरुले आज खोप पाउनु भयो । महानगरको यो व्यवस्था प्रशंशा योग्य छ । इन्द्रजात्रा व्यवस्थापन समितिका अध्यक्ष गौत्तम शाक्यले खोप कार्यक्रममा प्रतिक्रिया दिनुभयो । अब महानगरबाट थप कस्तो सहयोग अपेक्षा गर्नुहुन्छ? प्रश्नको उत्तरमा शाक्यले रथ यात्राका लागि नभइ नहुने श्री लाखे आजु, श्री हलचोक आकाश भैरव, पुलुकिसी आजुसहित सांस्कृतिक रुपमा उपस्थित नभइ नहुनेहरुका लागि मास्क, सेनिटाइजर, फेस सिल, पञ्जालगायतका स्वास्थ्य सुरक्षा सामाग्री उपलब्ध गराइदिन आग्रह गर्नुभयो ।
यस बर्ष इन्द्रजात्राका कार्यक्रम सुरु भइसकेका छन् । यस क्रममा भदौ २३ गते विहान १० बजेर ५२ मिनेटको साइतमा बनयात्रा सुरु गरिएको थियो । त्यसै दिन बेलुका ७ बजेर २७ मिनेटको साइतमा इन्द्रध्वजका रुपमा गाडिने लिङ्गोका लागि रुख काटिसकिएको छ ।
भदौ २९ गते मंगलबार विहान १० बजेर ३४ मिनेटको साइतमा लिङ्गोलाई नगर प्रवेश गराइनेछ । असोज २ गते शनिबार विहान ६ बजेर ५१ मिनेटको साइतमा इन्द्रध्वज उत्थान हुनेछ । त्यसको भोलिपल्ट असोज ३ गते कुमारी रथयात्रा सुरु हुनेछ । त्यस दिन बसन्तपुरको तल्लो टोल र असोज ४ गते माथिल्लो टोलमा रथ यात्रा हुनेछ । ८ गते नानिचा यात्रा हुनेछ । त्यसैदिन राती १० बजेर ५६ मिनेटको साइतमा इन्द्रध्वज पतन हुनेछ । यसपछि जात्रा सकिनेछ ।
बसन्तपुर कुमारी घर अगाडिको दश अवतार र माजु देग मन्दिर निर्माणाधीन अवस्थामा भएकोले भक्तहरु बसन्तपुरमा भेला भएर जात्रा अवलोकन गर्ने अवस्था छैन । अर्कोतिर कोविडका कारण मानिसहरु भेला हुन सक्ने अवस्था पनि छैन । जात्रा अवलोकनका विषयमा व्यवस्थापन समितिले भक्तहरुलाई बसन्तपुरमा भेला नहुन र आम सञ्चारबाट अवलोकन गरिदिन आग्रह गरेको छ ।
समितिका अध्यक्ष शाक्यले, रथ यात्राका समयमा स्थानीयहरु रथमा आएर भन्दा घरको वार्दली, झ्याल र ढोकाबाट सुरक्षितसाथ पूजा दिन र दर्शन गर्न आग्रह गर्नुभएको छ ।
