काठमाडौ । राष्ट्रपति श्रीमती विद्यादेवी भण्डारीले नेपाल एक चीन नीतिको पक्षमा सदैव दृढतापूर्वक उभिएको बताउनु भएको छ । राष्ट्रपति भबनमा आयोजित सी चिनफिङः चीनको शासन व्यवस्था, खण्ड २’ नेपाली संस्करण पुस्तकको लोकार्पण एवं खण्ड ३ को परिचयात्मक समारोहलाई सम्बोधन गर्दे राष्ट्रपति भण्डारीले मित्र राष्ट्र चीनका जायज चासो र सरोकारहरूप्रति नेपाल सधैँ संवेदनशील रहेको स्पष्ट पार्नुभएका छ ।
उहाँले नेपालको बहुआयामिक विकासका लागि मित्रराष्ट्र चीनबाट निरन्तर सहयोग प्राप्त गर्दै आएका स्मरण गर्दे पछिल्ला वर्षहरूमा चीन सरकारद्वारा प्रवद्र्धन गरिएको ‘बेल्ट एण्ड रोड पहलʼको नेपाल सदस्य बनेको पनि बताउनु भयो । राष्ट्रपति भण्डारीले हिमालय वारपार बहुआयामिक सम्पर्क सञ्जाललाई नेपालले अवसरका रूपमा ग्रहण गरेको उल्लेख गर्दे नेपाललाई भू–परिवेष्ठित राष्ट्रबाट भू–जडित राष्ट्रका रूपमा विकास गर्नका लागि चिनियाँ भूमि हुँदै समुद्रसम्म पहुँच प्राप्त गर्न हाम्रा दुबै देशबीच सम्झौताहरू भएका जनाउनु भएको छ ।
सम्बोधनमा उहाँले पूर्वाधारको पनि पूर्वाधारका रूपमा रहेको शिक्षा क्षेत्रको विकासमा चीन सरकारले प्रदान गर्दै आएको सहयोगका लागि आभार प्रकट गर्दे यस क्षेत्रमा हाम्रो साझेदारीलाई थप सघन तुल्याउनु पर्ने सुझाब दिनु भएको छ । राष्ट्रपति भण्डारीले नेपाल चीन सहकार्यबाट उत्पादित शैक्षिक जनशक्तिको सदुपयोग गरी समृद्धिको यात्रालाई सफल बनाउनु पर्ने खाँचो रहेको बताउनु भयो ।
राष्ट्रपति भण्डारीले विश्वव्यापी महामारीका रूपमा देखिएको कोभिड–१९ विरुद्धको खोपलाई विश्व समुदायको सार्वजनिक सेवामा उपलब्ध गराउने र आर्थिक रूपमा सर्वसुलभ बनाई सबैको पहुँच सुनिश्चित गर्ने महामहिम सीको मानवतावादी प्रतिवद्धताबाट नेपाल लगायत विश्वका धेरै देशहरू लाभान्वित भएको भन्दै चीनिया नेतृत्वको उच्च प्रशंसा गर्नुभयो ।
उहाँले नेपालका लागि कोभिड–१९ विरूद्धको अभियानमा मित्र राष्ट्र चीनद्वारा उपलब्ध गराइएका खोप, स्वास्थ्य सामग्री र मानवीय सहयोगका लागि म नेपाली जनता र नेपाल सरकारको तर्फबाट मित्र राष्ट्र चीनका जनता र सी प्रति हार्दिक कृतज्ञता व्यक्त गर्नुभयो । उहाँले चीनले शासकीय प्रवन्ध र अर्थतन्त्रमा हासिल गरेको अभूतपूर्व सफलता आजको विश्वमा आम चासो, चिन्तन र जिज्ञासाको विषय बन्न पुगेको बताउनु भयो ।
कार्यक्रम नेपालका लागि चिनियाँ राजदूत होउ यान्छीले नेपाल र चीन बीच परापूर्व कालदेखि नै मैत्रीपूर्ण घनिष्ठ सम्बन्ध रहिआएको बताउनु भयो । उहाँले भूगोल र प्रकृतिले हामीलाई एक अर्कासँग निकट बनाएका उल्लेख गर्दे हाम्रा दुई देशलाई महान बौद्ध सभ्यताको साझा विरासतले आपसमा जोडेको बताउनु भयो ।
दुवै देशले पारस्परिक मित्रता एवं विकासमा साझेदारीलाई ठूलो महत्व दिएका पनि राजदुत यान्छीले उल्लेख गर्नुभयो । चीन अध्यायन केन्द्रका कार्यबहाक अध्यक्ष सुन्दरनाथ भट्टराईले पुस्तक चीनको बिकासका बारेमा बुझ्न कोशेढुङ्गा बन्ने उल्लेख गर्नुभयो ।
