काठमाडौं । नेपाल मेडिकल काउन्सिलले सहिद गंगालाल हृदय केन्द्रमा फरक समूहको रगत चढाएपछि उपचारका क्रममा मृत्यु भएकी बालिकाको उपचारमा संलग्न चिकित्सकलाई स्पष्टिकरण सोधेको छ।
गत वैशाखमा ५ वर्षिय बालिकालाई फरक समूहको रगत चढाइएको थियो। फरक समूहको रगत चढाइएको केही दिनपछि उपचारका क्रममा बालिकाको मृत्यु भएको थियो। ओ पोजेटिभ रगत भएकी बालिकालाई ए पोजेटिभको रगत चढाइएको थियो।
घटनाका विषयमा छानबिन गर्न बनाइएको विशेष समितिले दिएको प्रतिवेदनपछि काउन्सिलले उपचारमा संलग्न चिकित्सकलाई ७ दिनभित्र स्पिष्टकरण दिन पत्र काटेको हो। यस्तै काउन्सिलले उपचारमा संलग्न रहेका अन्य स्वास्थ्यकर्मीलाई आवश्यक कारबाही प्रक्रिया अगाडि बढाउन नेपाल स्वास्थ्य व्यवसायी परिषद्मा सिफारिस गरिएको काउन्सिलको इथिकल कमिटीका संयोजक डा ढुण्डीराज पौडेलले जानकारी दिए।
उक्त घटनाका विषयमा छानबिन गर्न काउन्सिलले डा भगवान कोइरालाको संयोजकत्वमा विशेष समिति गठन गरेको थियो।
काउन्सिलले बालिकाको शल्यक्रियाको व्यवस्थापन गर्ने र रगत चढाउनु पर्छ भन्दै लेख्ने डाक्टर अपूर्व ठाकुरलाई निलम्बन किन नगर्ने भन्दै स्पष्टिकरण पेश गर्न पत्र काटेको छ। छानबिनका क्रममा डा ठाकुरले रगत चढाउनु पर्छ भन्ने विषयमा आफूले लेखेको तर उक्त कागजमा ‘ए पोजेटिभ’ रगत हो भनेर आफूले नलेखेको दाबी गरेका छन्।
यता अर्का चिकित्सक डा सन्दीप भण्डारीलाई पनि विभागिय कारबाही किन नगर्ने भन्दै स्पष्टिकरण सोधेको काउन्सिलले जनाएको छ।
उक्त उपचार प्रक्रियामा गलत समूहको रगत चढाउने काम हुनुमा ल्याब समेत दोषी देखिएको पाइएको भन्दै काउन्सिलले ल्याबमा कार्यरत ल्याब टेक्नीसियन सरला कोइराला र विन्देश्वर यादवलाई हदैसम्मको कारबाही गर्न नेपाल स्वास्थ्य व्यवसायी परिषदमा सिफारिस गरिएको डा पौडेलले जानकारी दिए।
सर्लाही सिसौटियाकी आकृति कुमारीको मुटुको भल्भमा समस्या थियो। ५ वर्षीया आकृतिको मुटुको भल्भ फेर्नका लागि वैशाख १३ गते गंगालालमा भर्ना गरिएको थियो। उनको १७ गते शल्यक्रिया गरिएको हो। तर, सो क्रममा उनलाई फरक समूहको रगत चढाइएको थियो।
फरक समूहको रगत चढाइएपछि उनको क्रियटिनन् बढेर ४ दशमलव १ एमजिडिएल पुगेको थियो। शल्यक्रियाअघि ती बालिकाको क्रियटिनिन् शून्य दशमलव ३ एमजिडिएल थियो। शल्यक्रियाअघि ३ लाख १३ हजार प्लेटलेट रहेकी ती बालिकाको शल्यक्रियापछि ७ हजारमा झरेको थियो।
फरक समूहको रगत चढाइएपछि झन् उनको स्वास्थ्य जटिल बन्दै गएपछि उनलाई पिआइसियूको १४ नम्बर बेडमा राखेर उपचार भइरहेको थियो। तर, उपचारका क्रममा उनको मृत्यु भएको थियो।
