काठमाडौं । ‘टुडेज उमन मिसेस नेपाल युके’ बिनु लामिछाने यतिबेला काठमाडौंमा छिन् । यही २२ देखि ३० डिसेम्बरसम्म चीनको गोन्जाओमा आयोजना हुने ‘४७ औँ मिसेस युनिभर्स २०१९’ मा लामिछानेले नेपाल र संसारभरि छरिएका नेपालीको प्रतिनिधित्व गर्नेछिन् । बेलायत बस्दै आएकी बिनुले मिसेस नेपाल युके २०१८ को बिजेता बनेका कारण उक्त प्रतिस्पर्धामा सहभागी हुने मौका पाएकी हुन् । लन्डन फेसन हाउसकी अध्यक्ष मनिषा डंगोल श्रेष्ठले मिसेस नेपाल युकेको आयोजना गर्दै आएकी छन् ।
नेपाल र विदेशमा रहेका नेपालीको तर्फबाट यसपटक बिनुले चीनमा प्रतिनिधित्व गर्ने मिसेस युनिभर्सको नेसनल डिरेक्टर मनिषाले बताइन् । प्रतियोगिताको तयारीका लागि बिनुलाई केही समयदेखि कोरियोग्राफर रोजिन शाक्यले ग्रुमिङ, प्रिजेन्टेसन, पर्सनालिटी लगायतको प्रशिक्षण दिइरहेका छन् । मिसेस युनिभर्स २०१९ को लागि आफूले अहिले सम्पूर्ण तयारी गरिरहेको बिनुले सञ्चारकर्मीलाई बताइन् ।
बेलायतमा डेन्टल सर्जरी प्राक्टिस म्यानेजरको रूपमा कार्यरत् बिनु नेप्लिज नर्सिङ एसोसिएसन युकेकी कोषाध्यक्ष समेत हुन् । लामो समयदेखि बेलायतमा रहेका विभिन्न संघ संस्थासँग जोडिएर सामाजिक सेवा गर्दै आएकी बिनु नेपालबाहिर रहेका नेपाली र नेपालको प्रतिनिधित्व गर्दै यसपटक मिसेस युनिभर्समा जान पाउँदा खुसी लागेको बताइन् ।
उनले यसपटक मिसेस युनिभर्स २०१९ मा ९० देशका प्रतियोगी महिलाबीच नेपाल, नेपाली र आफ्नो देशको भाषा, कला संस्कृतिलाई चिनाउने जनाइन् । मिसेस युनिभर्समा सहभागी हुन पाउँदा निकै उत्साहित भएको र आउँदो आइतबार २२ डिसेम्बरमा मिसेस युनिभर्स २०१९ का लागि चीनतर्फ प्रस्थान गर्ने बिनुले बताइन् ।
