बाँके । करोडौँ लगानीमा निर्माण भएका खानेपानीका ओभरहेड ट्याङ्की प्रयोगहीन अवस्थामा पुगेका छन् ।
स्थानीयलाई शुद्ध पिउने पानी वितरण गर्न नेपालगञ्ज उपमहानगरपालिका लगायतका स्थानीय तहमा निर्माण भएका ट्याङ्की सदुपयोगमा आउन सकेका छैनन् । तीन वर्ष लगाएर झण्डै पौने दुई करोड लागतमा ओभरहेड ट्याङ्की निर्माण भएका थिए । तर सर्वसाधारणले अहिले पनि पिउने पानी पाएका छैनन् ।
खानेपानी वितरणका लागि पाइप बिछ्याउने काम सम्पन्न भई परीक्षणसमेत भइसकेको छ । नेपालगञ्जको जयसपुरमा चार वर्षअघि खानेपानीको ओभरहेड ट्याङ्की निर्माण गरिएको थियो । पानी वितरण नगर्दै जयसपुर खानेपानी योजना अलपत्र परेको छ ।
पानी वितरणको तयारी भए पनि बीचमै रोकिएको जयसपुरका मुर्तजा अन्सारीले जानकारी दिनुभयो । उहाँले भन्नुभयो “वितरणका लागि परीक्षण भए पनि हालसम्म काम अघि वढेको छैन । ”
उहाँका अनुसार, जयसपुर खानेपानी योजनाको रेखदेख एक चौकीदारले गर्दै आएका छन् । जयसपुरमा निर्माण भएको योजनाबाट झण्डै एक हजार २०० जनसङ्ख्यालाई खानेपानी पुर्याउने लक्ष्य रहेको थियो ।
दुई सय २५ घनमिटरको ओभरहेड ट्याङ्कीको पानी कम्तीमा एक हजार परिवारलाई पिउने पानी वितरण गर्न सकिने खानेपानी तथा सरसफाइ डिभिजन कार्यालयले जनाएको छ । जयसपुरको जस्तै खजुरा गाउँपालिका–१ राधापुरको खानेपानी योजनाले पनि उस्तै नियति भोगिरहेको छ । उक्त योजनाले सर्वसाधारणलाई पिउने पानी वितरण गरे पनि विद्युत् महसुल बुझाउन नसक्दा बन्द भएको छ ।
विद्युत् महसुल बुझाउन नसकेपछि नेपाल विद्युत् प्राधिकरणले लाइन काटेको राधापुर खानेपानी उपभोक्ता समितिका अध्यक्ष देवप्रसाद बुढा जानकारी दिनुभयो । उहाँले उपभोक्ताबाट पानीको महसुल उठाउन नसकेपछि विद्युत् महसुल बुझाउन नसकेको स्पष्ट पार्नुभयो ।
कार्यालयका प्रमुख भोलाप्रसाद थापाले सञ्चालन भएका तीन खानेपानी योजना बन्द अवस्थामा रहेको जानकारी दिनुभयो । उहाँले भन्नुभयो “ उपभोक्ताका कारण खानेपानी योजना बन्द भएका हुन । बन्द योजना पुनःसञ्चालन गरिने छ ।”
बाँकेमा निर्माण भइरहेका १० खानेपानी योजना यसै आवमा सक्ने गरी काम भइरहेको कार्यालयले जनाएको छ । कुसुमको अम्बा खानेपानी योजना, कुसुम लिफ्ट खानेपानी, बैजनाथको पेडारी र नौबस्ता खानेपानी, कोहलपुरको विराट र शम्शेरगञ्ज, कचनापुर तथा भवनीयापुर खानेपानी योजना यसै आवमा पूरा हुने जनाइएको छ ।
बजेट अपुग भएकाले पाइपलाइन विस्तारको काम पूरा हुन नसकेको बताइएको छ । निर्माण भइरहेका योजनालाई यसै आर्थिक वर्षभित्र सम्पन्न गरेर नागरिकलाई शुद्ध पिउने पानी वितरण गर्नेगरी काम भइरहेको उहाँले बताउनुभयो ।
बाँकेमा बजेट उपशीर्षकअन्तर्गत प्रदेश सरकारको सघन खानेपानी विकास कार्यक्रम, केन्द्रीय सरकारको सशर्त अनुदानअन्तर्गत उच्च प्रविधियुक्त खानेपानी कार्यक्रम र तराई–मधेस खानेपानी सुधार कार्यक्रम सञ्चालनमा रहेको कार्यालयले जनाएको छ ।
कार्यालयका अनुसार उच्च प्रविधियुक्तअन्तर्गत ३३ र तराई–मधेसअन्तर्गत २४ र प्रदेश सरकारको बजेटबाट १३ योजना तथा १० आयोजना सञ्चालनमा रहेका छन् ।
