मुस्ताङ। मुस्ताङको कोरलानाकामा एक वर्षअघि स्थापना भएको अध्यागमन कार्यालयले आजदेखि औपचारिक रूपमा सेवा प्रवाह सुरु गरेको छ ।
नेपाल–चीनबीचमा रहेको कोरलानामा २०८० साल कात्तिक २७ गते उपल्लो मुस्ताङका नागरिकका लागि बाह्रै महिना खुला गरिएको थियो । त्यसपछि २०८१ साल कात्तिक १४ गते अध्यागमन कार्यालय स्थापना भएको थियो । यद्यपि सेवा भने सुरु भएको थिएन ।
कोरलानाकास्थित अध्यागमन कार्यालयका प्रमुख प्रवेश बडुवालले आजदेखि अध्यागमन कार्यालयको सेवा सुरु भएको जानकारी दिनुभयो । कार्यालयबाट सेवा लिएर आजै लोमन्थाङ र लोघेकर दामोदरकुण्ड गाउँपालिकाका–१३ जना जनप्रतिनिधिमण्डल कोरलानाका हुँदै एक साताका लागि चीनका ल्हासातर्फ प्रस्थान गर्नुभएको कार्यालय प्रमुख बडुवालले बताउनुभयो ।
“यस अध्यागमन कार्यालयबाट पहिलोपटक सेवा लिएर लोमन्थाङ गाउँपालिका अध्यक्ष टसी न्हर्बु गुरुङसहित छ जना र लोघेकर दामोदरकुण्ड गाउँपालिकाका उपाध्यक्ष छिरिङ ल्हामो गुरुङसहित सात गरी १३ जना जनप्रतिनिधिको टोली चीनको ल्हासा र कैलाश पर्वतका लागि प्रस्थान गरेको छ”, उहाँले भन्नुभयो ।
उहाँका अनुसार उक्त अध्यागमन कार्यालयबाट नेपाल प्रवेश गर्ने चिनियाँ र अन्य मुलुकका नागरिकका लागि एक सय ५० दिनको ‘अनअराइभल भिसा’ निःशुल्क उपलब्ध गराइनेछ । यद्यपि सरकारले उपल्लो मुस्ताङ प्रवेश गर्ने विदेशी नागरिकका लागि ५०० डलर प्रवेश शुल्क तोकेकाले केही प्राविधिक समस्या भने हुनसक्ने उहाँले उल्लेख गर्नुभयो ।
कोरलानाका हुँदै नेपाल प्रवेश गर्ने विदेशी पर्यटकले अध्यागमन विभागले तोकेका अन्य शुल्क बुझाएमा भिसा निःशुल्क उपलब्ध गराइने जनाइएको छ ।
कोरलानाका–ल्हासा–कैलाश पर्वतसम्मको पर्यटनमार्ग प्रवद्र्धन
मुस्ताङको कोरलानाका हुँदै चीनको ल्हासा र कैलाश पर्वतसम्म पर्यटनमार्ग प्रवर्द्धनका लागि संयुक्त पहल सुरु गरिएको छ ।
लोमन्थाङ गाउँपालिकाका अध्यक्ष टसी न्हर्बु गुरूङकोे नेतृत्वमा लोमान्थाङ र लोघेकर दामोदरकुण्ड गाउँपालिकाका १३ जना जनप्रतिनिधिको टोली पर्यटनमार्गको प्रवर्द्धनका लागि एक साता लामो चीनको ल्हासा हुँदै कैलाश पर्वततर्फ प्रस्थान गरेको हो ।
उक्त पहलले लोमन्थाङका साथै हिमाली क्षेत्रको पर्यटन, सांस्कृतिक सम्बन्ध र आर्थिक समृद्धिमा नयाँ आयाम थपिने लोमन्थाङ गाउँपालिकाका अध्यक्ष गुरुङले विश्वास व्यक्त गर्नुभयो ।
अध्यक्ष गुरुङले आफूहरूले व्यक्तिगत खर्चमा ल्हासा र धार्मिक पर्यटकीयस्थल कैलाश पर्वतको भ्रमणमा निस्किएको बताउनुभयो ।
