काठमाडौं । स्वर्णलक्ष्मी बहुउद्देश्यीय सहकारीको बचत रकम अपचलन प्रकरणमा पक्राउ परेका दुई जना धरौटीमा रिहा भएका छन् ।
काठमाडौं जिल्ला अदालतको आदेश अनुसार मंगलबार सहकारीको लेखा समिति सदस्य सुनिता नेवा र सञ्चालक समिति सदस्य कमल लामा धरौटीमा रिहा भएका हुन् ।
मंगलबार जिल्ला अदालतका न्यायाधीश पदमराज पाण्डयेको इजलासले उनीहरुलाई धरौटीमा रिहा गर्न आदेश गरेका थिए । नेवा चार लाख र लामा तीन लाख धरौटी बुझाएर रिहा भएका जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले जानकारी दिए ।
स्वर्णलक्ष्मीको ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोपमा ३९ जनालाई प्रतिवादी बनाउँदै प्रहरीले सहकारी ठगी र संगठित अपराधको कसुरमा मुद्दा दायर गरेको थियो ।
