काठमाडौं । पूर्वगृहमन्त्री एवं राष्ट्रिय स्वतन्त्र पार्टी (रास्वपा) सभापति रवि लामिछानेलाई सहकारीको रकम अपचलन प्रकरणमा बयानका लागि पोखराबाट वीरगञ्ज लगिँदैछ ।
उनलाई पोखराबाट काठमाडौं हुँदै हवाइ मार्गबाट सिमरा लगेर वीरगञ्ज पुर्याइने छ । वीरगञ्जको आदर्शनगरमा सञ्चालित सानो पाइला बचत तथा ऋण सहकारी संस्थासम्बन्धी मुद्दामा प्रहरीले लामिछानेसँग बयान लिनेछ ।
जिल्ला प्रहरी कार्यालय पर्साले रविसहित १४ जनाविरुद्ध जिल्ला अदालतबाट पक्राउ पुर्जी लिए अनुसन्धान थालिरहेको छ ।
सोही प्रकरणमा बयान लिन प्रहरीले पूर्वडीआईजी छविलाल जोशीलाई स्थलमार्गबाट आइतबार नै वीरगन्ज पुर्याइसकेको छ ।
व्यवस्थित हिरासत कक्ष नभएका कारण पर्सा प्रहरीले केही व्यवस्थापन गरेर छविलाल जोशी र रामबहादुर खनाललाई जिप्रकाको महिला हिरासतमा राखेको छ । रविलाई पनि सोही कक्षमा राखिने प्रहरीको भनइ छ ।
जिप्रका पछाडि अधिकृत आवास जाने बाटोसँगै रहेको महिला सेलको छेउमा महिला हिरासत रहेको र महिला कैदी नहुँदा खाली हुने भएकाले त्यसैमा रंगरोगन गरेर उनीहरूलाई राखिने प्रहरीले जनाएको छ ।
जिप्रका पर्साले यसअघि भीआइपी थुनुवालाई नारायणी मेडिकल कलेजको अतिथि गृहमा राख्दै आएको थियो ।
