काठमाडौं । गठबन्धन दल नेकपा एकीकृत समाजवादीको विद्रोहले सत्ता गठबन्धन कमजोर बनेको छ । गठबन्धभित्र कुनै निर्णय गर्दा प्रधानमन्त्री पुष्पकमल दाहाल र नेकपा एमालेका अध्यक्ष केपी शर्मा ओलीको मात्र भूमिका हुने गरेको भन्दै एकीकृत समाजवादीका अध्यक्ष माधवकुमार नेपाल रुष्ट बन्दै आएका थिए । त्यसको परिणाम स्वरुप हिजो सुदूरपश्चिम प्रदेशमा एमाले र माओवादीभन्दा नेकपा एस फरक कित्तामा उभिएको छ । यसले गठबन्धन मै संसय पैदा गरिदिएको छ ।
नेकपा एसले सुदूरपश्चिम प्रदेशको नेतृत्व चाहेको छ । तर प्रधानमन्त्री दाहाल र एमाले अध्यक्ष ओलीबीच नागरिक उन्मुक्ति पार्टीका कैलाश चौधरीलाई मुख्यमन्त्री बनाउने सहमति भएको थियो । कैलाल नागरिक उन्मुक्ति पार्टीकी अध्यक्ष रञ्जिता श्रेष्ठ निकट हुन् । तर यो कुरा माधवकुमार नेपाललाई मन परेर । उनले सहमति मान्य नहुने चेतावनी दिएर बालुवाटारबाट बाहिरिएको छ ।
लगत्तै अध्यक्ष नेपालको दल नेकपा एकीकृत समाजवादीले सुदूरपश्चिम प्रदेशमा नेपाली कांग्रेसको समर्थनमा मुख्यमन्त्रीको दाबी पेश गर्ने तयारीमा रहेका नागरिक उन्मुक्ति पार्टीकै लक्ष्मणकिशोर चौधरीलाई सहयोग गर्ने निर्णय गर्यो । नेकपा एसका प्रदेशसभा सदस्यको हस्ताक्षर बुझाएर उनले मुख्यमन्त्रीमा दाबी पेश गरिसकेका छन् ।
संघीय सत्ता गठबन्धनमा रहेका दलका प्रदेशसभा सदस्यहरु विपक्षी दलसँगको सहकार्यमा सरकार गठनमा सहभागी हुन्छन् भने त्यो गठबन्धनको मर्मविपरित हुने भएकाले नेतृत्व अप्ठ्यारोमा परेको छ । यसले डेढ महिना अघि मात्र बनेको संघीय समीकरण कति दिन अघि बढ्छ भन्ने अनिश्चिता थपिदिएको छ ।
नेकपा एसका नेताहरु पनि अहिलेको संघीय सत्ता गठबन्धन लामो समय नरहने चेतावनी दिन थालिसकेका छन् । गठबन्धनभित्र छलफल नहुने र एकलौटी निर्णय गर्ने परिपार्टी बढेकोमा उनीहरुको असन्तुष्टि छ । यो असन्तुष्टि बढ्दै गए कुनै पनि दिन नेकपा एस विपक्षीमा पुग्न सक्छ ।
यता प्रधानमन्त्री पुष्पकमल दाहाल पनि दबाबमा छन् । उनले जुन उद्देश्य राखेर समीकरण परिवर्तन गराएका थिए, त्यसअनुसारको नतिजा हात परेको छैन । प्रधानमन्त्री दाहालको ध्यान सत्ता समीकरण मिलाउन र पद जोगाउनमै छ । बाँकी विषयमा उनले ठोस काम गर्न सकेका छैनन् । यसले नागरिकका निराशा चिर्न पनि उनलाई समस्या परेको छ ।
