काठमाडौ । एसिड आक्रमणमा परेकी किशोरी मुस्कान खातुन अन्तर्राष्ट्रिय साहसी महिला (आईडब्ल्यूओसी) अवार्ड बाट सम्मानित हुनु भएको छ । अमेरिकाकी बिदेश मन्त्रालयलले जनाए अनुसार अमेरिकी प्रथम महिला जिल बाइडन र विदेश मन्त्री टोनी ब्लिङ्कनले ८ मार्चमा एक भर्चुअल कार्यक्रमका बिच उक्त पुरस्कार मुस्कान लगायतका विजेताहरूलाई प्रदान गर्नुहुनेछ।
तेजाब आक्रमणको अन्त्यका लागि मुस्कानले गरेको निरन्तर कार्यका लागि यो अवार्ड प्रदान गरिएको जनाईएको छ । हाल १५औँ वर्षमा रहेको आईडब्ल्यूओसी पुरस्कारले प्रायजसो ठुलो व्यक्तिगत जोखिम र त्यागमा शान्ति, न्याय, मानव अधिकार, लैङ्गिक समानता, र महिला सशक्तीकरणको वकालत गर्ने असाधारण साहस र नेतृत्व प्रदर्शन गरेका विश्वभरका महिलाको सम्मान गर्दछ। यो तहको अबार्ड पाउने खातुन पहिलो नेपाली हुनहुन्छ ।
वीरगन्ज महानगरपालिका–११, श्रीपुरकी खातुनलाई २०६६ भदौ २० गते बिहान बिद्यालय जादै गर्दा दुई किशोरले एसिड प्रहार गरेका थिए । एसिडबाट खातुनको अनुहार, छाती, हातखुट्टा लगायत अंगहरु जलेका थियो । लामो समय सम्म कीर्तिपुर अस्पताल लगायत स्थानमा उनको उपचार भएको थियो । बिरगंञ्ज छप्कैयास्थित मामाको घरमा बसेर अध्ययन गर्दै गरेकी मुस्कानमाथि विद्यालय जाँदै गर्दा एसिड आक्रमण भएको थियो ।
उपचारकै क्रममा मुस्कानले प्रधानमन्त्री केपि ओली लाई अस्पतालको संैया बाट एक पत्र लेख्दै एसिड आक्रमणकारीलाई मृत्युदण्डको सजाय माग गरेकी थिईन । मुस्कानले लेखेको पत्र
मिति– २०७६ –८–५
माननीय प्रधानमन्त्रीज्यू,
म मुस्कान खातुन अन्सारी,
मेरो तर्फबाट नमस्ते । म एउटा तेजाब आक्रमणको नानी । हजुरलाई एउटा सानो चिठी । यो घटना मसँग घटिएको हो । यो घटनाको पीडा भनेको ठूलो घटना हो । पहिला जेनी खड्का र संगिता मगर तेजाब आक्रमण भए बेला कडा भन्दा कडा कानुन भइदिएको भए आज म यो अस्पतालको बेडमा हुन्थिनँ होला ।
प्रधानमन्त्रीज्यू हजुरको दुई तिहाई बहुमतको सरकार छ । हजुरको ठाउँमा म भइदिएको भए त्यो अपराधीलाई फाँसी दिन्थेँ । यसपालि ठूलोभन्दा ठूलो सजाय पाओस् ताकि म जस्तो एउटा बालिका या चेलीबेटी वा कसैमाथि तेजाब आक्रमण नहोस् । मैले जति पीडा खपेको छु, त्यो पीडा अरू कोही माथि पनि नहोस् । यो पीडा भनेको सानो पीडा होइन । एउटा देशकै ठूलो पीडा हो । आमा र बुवाको पीडा पनि धेरै ठूलो पीडा हो ।
यो पीडा कसैको आमाबुवाले खप्न नपरोस् । त्यो दोषीलाई यसपालि ठूलो सजाय होस् । मेरो हजुरसँग बिन्ती र अपेक्षा छ । हजुरसँग मेरो एउटा अनुरोध छ कि मेरो पीडा बुझिदिनु होस् । यो घटना कसैमाथि नहोस् र कोही पनि तेजाब आक्रमण भएको चेलिबेटी अस्पताल नआओस् भन्ने अनुरोध छ ।
धन्यवाद ।
मुस्कानको पत्र पछि प्रधानमन्त्री ओलीले बालुवाटारमा बोलाई अभियन्ता उज्वल थापा सहितको टिमसंग छलफल समेत गर्नुभयो । छलफलको केही दिन पछि सरकारले तेजाब ९एसिड० तथा ज्वलनशील पदार्थ प्रयोग गरी कसैको शरीर अंगभङ्ग गर्ने र अपराध गर्न लगाउने व्यक्तिमाथि २० वर्ष कैदसम्म र १० लाख रुपैयाँसम्म जरिवाना हुने नयाँ कानून अध्यादेश मार्फत जारी गरेको थियो ।
यसै गरी मुलुकी अपराध संहिता २०७४ मा भएको एसिडजन्य अपराधमा संलग्नलाई अधिकतम ८ वर्ष कैद र ५ लाखसम्म जरिवाना हुने व्यवस्था पनि गरेको थियो । मन्त्रिपरिषद्ले ‘फौजदारी कसुर तथा फौजदारी कार्यविधिसम्बन्धी केही ऐन संशोधन गर्ने अध्यादेश– २०७७’ ले ६ वटा ऐनका एसिड अपराधसम्बन्धी कसुर र सजायका प्रावधान हेरफेर गरी नयाँ कानूनको निर्माण गरेको हो ।
