मोरङ: कोशी प्रदेशमा एमाले नेतृत्वमा रहेको सरकार अल्पमतमा परेपछि चालु बजेट अधिवेशनलाई अन्त्य गरी अध्यादेशबाट बजेट ल्याउने तयारी थालिएको छ ।
वर्षे अधिवेशन जेठ १४ गते देखि शुरु भएर छैठौ बैठक आउँदासम्म सरकार अल्पमत परेको सेरोफेरोमा प्रदेश सरकारले बजेटको सिद्धान्त र प्राथमिकता सदनमा छलफल गराएर आज छैठौँ बैठकमा प्रदेश प्रमुख परशुराम खापुङ्गबाट सदनमा सरकारको नीति तथा कार्यक्रम पनि सार्वजनिक भइसकेको छ ।
सरकार बाहिरका दल नेपाली कांग्रेस संसदीय दलको तर्फबाट केदार कार्की, नेकपा एमाले एकीकृत समाजवादीको तर्फबाट राजेन्द्रुकुमार राई र नेकपा माओवादी केन्द्रको तर्फबाट गणेशप्रसाद उप्रेतीले सरकार अल्पमतमा परीसकेपछि यात विश्वासको मत लिनु पर्छ नभए सरकारबाट राजिनामा दिएर मार्ग प्रशस्त गर्नु पर्छ भनेर प्रदेश सभामा आवाज उठाउनु भएको थियो ।
अल्पमतमा परेका सरकारले चालु अधिवेशनलाई अन्त्य गरेर अध्यादेशबाट बजेट ल्याउन खोज्नु संविधान विपरीत रहेको टिप्पणी गरिरहनु भएका दलका नेताको आवाजलाई सत्तापक्ष नेकपा एमाले संसदीय दलका तर्फबाट प्रदेश सदस्य रेवतीरमण भण्डारीले जवाफ फर्काउनुभएको थियो ।
सबै विकल्प बन्द भएपछि कानूनले दिएको अधिकार प्रयोग गरी प्रदेश सरकारले अध्यादेशबाट बजेट ल्याउने उद्घोष गरेको केही समय नबित्दै सदन स्थगन भएको सूचना जारी भएको छ ।
यसैबीच कोशी प्रदेशका प्रदेश प्रमुख परशुराम खापुङ्गले जेठ ३१ गते बुधवार राति १२:०० बजेदेखि प्रदेश सभाको चालु दोस्रो तथा बजेट अधिवेशन अन्त्य गर्नु भएको छ।
प्रदेश प्रमुख खापुङ्गले कोशी प्रदेश सरकार मन्त्रिपरिषदको जेठ ३१ गतेको सिफारिश अनुसार नेपालको संविधान धारा १८३ को उपधारा (२) बमोजिम प्रदेश सभाको अधिवेशन अन्त्य गर्नु भएको हो ।
प्रदेश सभाको आज दिउँसो बसेको वैठकले प्रदेश सभाको अर्को बैठक बिहिवार दिनको ११ बजे वस्ने सभामुख बाबुराम गौतमले सदनलाई जानकारी दिनु भएको थियो । रासस
