धरान । पटक–पटक कार्यापालिका बैठक बहिष्कार भएपछि सुनसरीको धरान उपमहानगरपालिकाका प्रमुख हर्कराज राई (हर्क साम्पाङ)ले फेरि वडाध्यक्षहरुको राजिनामा माग्नुभएको छ । यसअघि गत पुस १ गते पनि उहाँले कार्यपालिकासहित वडाध्यक्षहरुको राजीनामा माग्नुभएको थियो ।
“‘कसैले ‘म बैठक बस्दिन’ भन्न पाइँदैन त्यसैले कर्तव्य पुरा नगरेको र जनताको काम गर्न असक्षम भएको घोषणा गर्दै बैठक बहिष्कार गर्ने जति सबैले नैतिकताको आधारमा तुरुन्तै राजीनामा दिएर बाटो प्रसस्त बनाई आम धरानबासी जनता र लोकतन्त्रलाई सहयोग गर्न अनुरोध छ”, नगरप्रमुख सम्पाङले जारी गरेको प्रेस विज्ञप्तिमा भनिएको छ ।
विगत केही महिनादेखि बिना कुनै खास कारण पटकपटक कार्यपालिका बैठक बहिष्कार गरेर जनादेशको अपमान गर्दै जनताको सुशासन र विकास पाउनुपर्ने अधिकारमाथि खेलबाट गरिरहेको र आफ्नो कर्तव्य पूरा नगरेको उहाँले वडाध्यक्षहरुमाथि आरोप लगाउनुभएको छ ।
वडाहरुमा के–कस्ता योजना, कार्यक्रम सम्पन्न भए भन्ने जानकारी मागेको कुरालाई असहमति राखिरहनु पर्ने कुनै कारण नभएको भन्दै उहाँले वडाहरुमा के कस्ता, के कति काम भएका छन तुरुन्तै सार्वजनिक गर्न वडाध्यक्षहरुलाई निर्देशन समेत दिनुभएको छ ।
जनताको विकासका कामहरु गर्न गराउन निर्णय गर्नुपर्ने महत्त्वपूर्ण बैठकलाई बहिष्कार गर्नेहरुप्रति खेद प्रकट गर्दै उहाँले स्थानीय सञ्चालन ऐन, २०७४ को धारा १६ (४) को घ (वडाध्यक्ष तथा कार्यपालिका सदस्यहरुको काम, कर्तव्य र अधिकार) को १ अनुसारको कर्तव्य पूरा नगरेको देखिएकोले तुरुन्तै सच्चिएर बैठकमा उपस्थित हुन आह्वान गर्नुभएको छ ।
