काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले चितवनमा बिहीबार दिउँसो हुने आमसभामा आम मतदातालाई उपस्थितिका लागि अनुरोध गर्नुभएको छ ।
सामाजिक सञ्जाल फेसबुकमार्फत उहाँले सारा राजनीतिक दल एकातिर र रास्वपा अर्कातिर भएको आज (बिहीबार) को आमसभा विशेष हुने उल्लेख गर्नुभएको छ ।
उहाँले भन्नुभएको छ, “यो वारपारको राजनितीक भिडन्तबारे आज हामी तीनै भाइले चितवनका जनतामार्फत सिङ्गो देशलाई केही सुनाउनु छ। आजको तपाईंको उपस्तिथिले अर्थ राख्छ। आज चितवनमा खास मान्छेहरु पनि आउँदैछन्। ३ बजे गेष्ट हाउस चौर।”
यही वैशाख १० गते आइतबार हुन लागेको तीन क्षेत्रको उपनिर्वाचनका लागि आज राति १२ बजेदेखि प्रचारप्रसार निषेध गरिँदैछ ।
प्रतिनिधिसभा सदस्यका लागि बारा निर्वाचन क्षेत्र नं २, तनहुँ निर्वाचन क्षेत्र नं १ र चितवन निर्वाचन क्षेत्र नं २ मा हुन लागेको निर्वाचनका लागि निषेधको अवधि लागू हुने भएको हो ।
आज चुनावी प्रचारप्रसारको अन्तिम दिन भएकाले रास्वपाले चितवन–क्षेत्र नं २ मा विशाल आमसभा गर्ने भएको हो । उक्त निर्वाचन क्षेत्रबाट रास्वपाका सभापति लामिछाने उम्मेदवार हुनुहुन्छ ।
