विराटनगर । प्रदेश नामकरणको विरोधमा भएको प्रदर्शनका मृत्यु भएका पदम लिम्बू (लाजेहाङ) को अन्तेष्टि शनिबार गरिने भएको छ ।
कोशी प्रदेश नामकरणको विरोधमा गत चैत ५ गते विराटनगरमा भएको प्रदर्शनमा घाइते भएका लिम्बूको चैत १० गते उपचारका क्रममा मृत्यु भएको थियो ।
मृत्यु भएको २९ दिनपछि उनको अन्त्येष्टि गर्न लागिएको हो । संघीय लोकतान्त्रिक राष्ट्रिय मञ्चकी केन्द्रीय उपाध्यक्ष विष्णु तुम्बाहाङ्फेका अनुसार वैशाख ९ गते शव यात्रापछि अन्त्येष्टि गरिने छ । अन्त्येष्टिअघि शवलाई अन्तिम श्रद्धाञ्जलिका लागि सुनसरीको धरान, इटहरी र विराटनगरमा राखिनेछ ।
मुख्यमन्त्री कार्यालय विराटनगर अगाडि केही समय श्रद्धाञ्जलिका लागि शव राखेर बेलबारीमा लगेर अन्त्येष्टि गर्ने तयारी रहेको तुम्बाहाङ्फेले जानकारी दिनुभयो । मोरङको बेलबारी–२ लालभित्ती स्थायी घर भएका लिम्बू धरान बस्दै आएका थिए ।
चैत ५ विराटनगरमा भएको प्रदर्शनका क्रममा टाउकोमा चोट लागेका लिम्बूलाई चैत ९ गते बेहोस अवस्थामा बिपी कोइराला स्वास्थ्य विज्ञान प्रतिष्ठान धरानमा भर्ना गरिएको थियो । चैत १० गते उनको मृत्यु भएको थियो ।
पहिचान पक्षधरको मागअनुसार सरकारले गत २४ चैतमा शहीद घोषणा गरेको थियो । साथै सरकारले उनको परिवारलाई १० लाख राहत दिने निर्णय गरेको थियो ।
गत फागुन १७ गते प्रदेशसभाले प्रदेशको नाम कोशी राखेको थियो । पहिचान पक्षधर दल र जातीय संस्थाले प्रदेशको पुन: नामकरणको माग गर्दै प्रदर्शन गरिरहेका छन् ।
