काठमाडौं । व्यवसायी दुर्गा प्रसाईंसँगको अडियो संवादबारे राष्ट्रिय स्वतन्त्र पार्टी (रास्वपा)का सांसद ढाकाकुमार श्रेष्ठमाथि सो पार्टीको अनुशासन समितिले छानबिन सकाएको छ ।
सभापति रवि लामिछानेले श्रेष्ठको अडियो प्रकरणमाथि छानबिन गरी प्रतिवेदन बुझाउन समितिलाई ७२ घण्टाको समय दिएका थिए ।
जसकारण आज अबेरसम्म प्रतिवेदन पठाउने समितिको तयारी छ । अडियोमा रहेको आवाज ढाकाकै रहेको विश्लेषण गरेको छ । तर, समय अपुग भएपछि अडियोको फरेन्सिक टेस्ट गरिएन । फरेन्सिक टेस्टको प्रक्रियामा जाँदा समय लाग्न सक्ने भएकाले त्यसलाई थाँती राखिएको बताइएको छ ।
फोन संवादको अडियोको आवाज आफ्नो नभएको दाबी ढाकाकुमारको छ । समितिले दिने प्रतिवेदनका आधारमा भोलि नै पार्टी केन्द्रीय समिति बसेर कारबाहीको विषयमा निर्णय लिइने रास्वपा स्रोतले जनाएको द्ध ।
