काठमाडौँ । राष्ट्रिय स्वतन्त्र पार्टी (रास्वपा)का सांसद ढाकाकुमार श्रेष्ठले मेडिकल व्यवसायी दुर्गा प्रसाईंसँग २ करोड रुपैयाँ मागेको अडियो सार्वजनिक भएको छ ।
सार्वजनिक अडियोमा उनले आफू स्वास्थ्यमन्त्री बन्न लागेको र पार्टीलाई बुझाउनुपर्ने भन्दै मेडिकल व्यवसायी प्रसाईंसँग २ करोड रुपैयाँ सहयोग मागेको खुलेको छ ।
अडियोमा श्रेष्ठले भनेका छन्, ‘हाम्रो भागमा स्वास्थ्य मन्त्रालय पर्ने भयो । मन्त्रीका लागि रवि सरलाई २ करोड बुझाउनुपर्ने कुरा आएको छ । मसँग पैसा छैन । अहिले एक करोड जति दिँदा हुन्छ । एक करोडचाहिँ चेक दिँदा पनि हुन्छ । त्यसैले अलिकति सहयोग चाहिएको छ ।’
त्यसको जवाफमा प्रसाईंले आफूले २ करोड उपलब्ध गराइदिने ग्यारेन्टी दिँदै श्रेष्ठलाई अघि बढ्न लगाएका छन् । प्रसाईँले यसअघि स्वास्थ्य राज्यमन्त्री रहेकी डा. तोसिमा कार्कीले ‘लडाई त गर्दिनन्’ भन्दै प्रस्ट्याएका छन् । जवाफमा श्रेष्ठले टिमबाट निर्णय हुने भन्दै ढुक्क हुन भनेका छन् । अडियो सार्वजनिक भएपछि राष्ट्रिय स्वतन्त्र पार्टी (रास्वपा)ले उनलाई कारबाही गर्ने भएको छ ।
रास्वपाले पार्टीहित विपरीत काम गरेको भन्दै उनलाई साधारण सदस्यसमेत नरहने गरी कारबाही गर्ने भएको हो । श्रेष्ठलाई कारबाही गरिएको पत्र पार्टीले संसद सचिवालयलाई पठाउने तयारी गरेको रास्वपा स्रोतले जनाएको छ ।
