महोत्तरी। शिक्षा तथा खेलकुदमन्त्री सुस्मित पोखरेलले बर्दिवास मेडिकल कलेज निर्माणले अब गति लिने बताउनुभएको छ ।
आज कलेज निर्माणका लागि प्रस्तावितस्थल बर्दिवास-४ माइस्थानमा सरोकार भएका निकायका प्रतिनिधिसँग छलफल गर्दै उहाँले कलेज निर्माण प्रक्रिया अघि बढिसकेको स्पष्ट गर्नुभयो ।
“कलेज बन्ने/नबन्ने विभिन्न थरिका कुराले यस क्षेत्रमा चिन्ता र चासो बढेको छ । अब यसबारे धेरै चिन्ताभन्दा पनि कलेज निर्धारित समयमै बन्छ भन्नेमा सबैलाई विस्वश्त पार्न चाहन्छु”, मन्त्री पोखरेलले भन्नुभयो । यसपालिको बजेटमा कलेज निर्माणका लागि रु २५ करोड रकम विनियोजन गरिएको जनाउँदै उहाँले काम अघि बढाउन अझै रकमको सुनिश्चिततामा आपूm प्रयासरत रहने प्रतिबद्धता जनाउनुभयो ।
मन्त्री पोखरेलले भन्नुभयो, “भर्खरै मन्त्रिपरिषद्ले बर्दिवास मेडिकल कलेज पूर्वाधार निर्माण विकास आयोजना, बर्दिवासको अवधि एक वर्ष थपेको छ, यो कलेज बनाउन थपिएको हो । काम थाल्दै गएर सम्पन्न हुन तीन-चार वर्ष लाग्नसक्ने देखिन्छ ।”
बर्दिवास मेडिकल कलेज पूर्वाधार निर्माण विकास आयोजना बर्दिवास कार्यालयले आयोजना गरेको छलफलमा महोत्तरी निर्वाचन क्षेत्र नं १ का प्रतिनिधिसभा सदस्य प्रमोदकुमार महतोले कलेज निर्धारित समयमा सम्पन्न गराउन वर्तमान सरकारले हरप्रयास गर्ने उल्लेख गर्नुभयो ।
मधेस प्रदेश सरकारका श्रम तथा यातायातमन्त्री शारदा थापाले निर्धारित समयमा काम सम्पन्न गराउन आफूले सहकार्य र समन्वय गर्ने बताउनुभयो । यसैगरी बर्दिवासका नगरप्रमुख प्रहलादकुमार क्षेत्रीले प्रस्तावित ठाउँमा कलेज निर्माणका पक्षमा आमजनता रहेकाले सबैको साथसहयोग रहने प्रतिबद्धता जनाउनुभयो ।
छलफल कार्यक्रममा आयोजना निर्देशक देवीप्रसाद सुवेदीले अब प्रस्तावितस्थलको भोगाधिकार आफ्नो कार्यालयले पाइसकेको हुँदा रुख कटानको प्रक्रिया अघि बढेको जानकारी दिनुभयो ।
नेपाल सरकारको आर्थिक वर्ष २०७३/७४ को कार्यक्रममा परेर २०७५ वैशाखमा आयोजना कार्यालय स्थापना भए पनि वन क्षेत्रभित्रको प्रस्तावित जग्गाको भोगाधिकारका लागि विभिन्न निकायबाट काम सम्पादन हुन समय लाग्दा कलेज निर्माण पछि पर्दै आएको थियो ।
कलेजका लागि पहिलो चरणमा अस्पताल र प्रशासनिक भवन निर्माण चालु आवमा विनियोजित रु २५ करोडबाट थालिने आयोजना कार्यालयले जनाएको छ । कार्यक्रममा प्रमुख जिल्ला अधिकारी इन्द्रदेव यादवले थप रकमको सुनिश्चितता बढ्दै गएसँगै निर्माणले गति लिने विश्वास व्यक्त गर्नुभयो ।
बर्दिवास-४ को अटावे खोल्सी पूर्व, भब्सीखोलाबाट पश्चिम, पूर्वपश्चिम महेन्द्र राजमार्गबाट उत्तर र माइस्थानबाट बर्दिवास चोकतर्फको सडकबाट दक्षिणको वनक्षेत्रको ५४ हेक्टर जग्गामा कलेज बन्न प्रस्ताव गरिएकामा उक्त प्रस्ताव कार्यान्वयनको चरणमा पुगेको आयोजना निर्देशक सुवेदीले जानकारी दिनुभयो ।
कूल ६०० शय्याको अस्पतालसहित कलेजका लागि संरचना बन्न विस्तृत कार्ययोजना प्रस्तावमा रु १० अर्ब खर्च लाग्ने जनाइएको छ ।
आजको छलफलमा मन्त्री पाखरेलले स्रोतको सुनिश्चितताका लागि प्रयत्न भइरहेको बताउँदै अब खर्चको अभावमा काम रोकिन नदिने प्रतिबद्धता जनाउनुभएपछि यस क्षेत्रमा उत्साह बढेको सर्वसाधारणले बताएका छन् । रासस
