काठमाडौँ। राष्ट्रिय स्वतन्त्र पार्टी (रास्वपा) को केन्द्रिय समिति बैठकले पार्टीको दोस्रो महामन्त्रीका रूपमा भूपदेव शाहको मनोनयनलाई अनुमोदन गरेको छ ।
पार्टी कार्यालयमा सम्पन्न बैठकले महामन्त्रीसँगै नयाँ सचिवालय सदस्यहरूको चयन र सांसदहरूले बुझाउने लेभीमा परिमार्जन गर्ने लगायतका महत्वपूर्ण निर्णयहरू गरेको पार्टी प्रवक्ता मनिष झाले जानकारी दिनुभयो ।
बैठकले सचिवालयले आईतवार गरेको निर्णयहरूलाई पारित गरेको छ । जसमा केही समिति र विभागहरूमा सदस्य थप गर्ने निर्णय भएको छ ।
विशेष गरी सांसदहरूले बुझाउने मासिक लेभीमा परिमार्जन गरिएको छ । १६ हजार ५ सय सांसदहरूले तिर्नुपर्नेबाट त्यसलाई १५ हजारमा घटाइएको छ भने मन्त्रीहरूको हकमा १८ हजार यथावत राखिएको छ । स्वकीय सचिवहरूले पनि पार्टीप्रति लगाव राखुन् भनेर उनीहरूले पाउने सुविधाबाट मासिक २ हजार रुपैयाँ दिनुपर्ने निर्णय भएको छ ।
यसैगरी, केन्द्रिय सदस्य तथा निर्वाचित सांसद सागर ढकाल र सरिता ज्ञवालीलाई केन्द्रिय सचिवालय सदस्यमा थप गरिएको छ । उहाँहरू दुईजनाको शपथ ग्रहण कार्यक्रम समेत आजै सम्पन्न हुनेछ । नवनियुक्त महामन्त्री भूपदेव शाहलाई आगामी महाधिवेशन र निर्वाचन लक्षित समितिहरू बनाउने जिम्मेवारी दिइएको छ ।
बैठकमा गृहमन्त्री र छानबिन समितिका विषयमा भने कुनै औपचारिक छलफल भएन । प्रवक्ता झाले समाचार माध्यममा आएका विषयहरूबारे पार्टी नेतृत्व सचेत रहे पनि ठोस प्रश्ताव र एजेन्डा नभई निष्कर्षमा पुग्न नसकिने स्पष्ट पार्नुभयो । उहाँले ‘राइट टु रिकल’ को अधिकार नेतृत्वसँग हुने भन्दै पार्टी प्रक्रियाअनुसार अगाडि बढ्ने बताउनु भयो ।
पार्टीले अहिले आफ्नो संगठनलाई बलियो बनाउने र महाधिवेशनमार्फत वैधानिक रूपमा अझ शक्तिशाली बनाउने लक्ष्य राखेको छ । –न्युज एजेन्सी नेपाल
