ललितपुर। राष्ट्रपति रामचन्द्र पौडेलले आज ललितपुर महानगरपालिकाले निर्माण गरेको भूकम्प प्रतिरोधी नयाँ प्रशासनिक भवनको उद्घाटन गर्नुभएको छ ।
महानगर प्रमुख चिरीबाबु महर्जनले महानगरको प्रशासनिक कार्य सञ्चालन हुँदै आएको भवन अपर्याप्त भएकाले ५२ हजार पाँच सय वर्गफिटमा भूकम्प प्रतिरोधात्मक अध्याधुनिक भवन निर्माण गरिएको जानकारी गराउनुभयो ।
“महानगरभित्रका २२ वटा वडामा अपाङ्गमैत्री कार्यालय भवन निर्माण भइसकेका छन्, बाँकी वडा कार्यालय पनि अपाङ्गमैत्री र अत्याधुनिक बनाइने छ, ललितपुर महानगरलाई स्वच्छ, सफा र आकर्षक सहरका रुपमा विकास गर्दै बस्नयोग्य नगरको रुपमा विकास गर्नका लागि हामी क्रियाशील रहेका छौँ, शिक्षा, स्वास्थका साथै सामाजिक सुधारमा उल्लेख काम गरेका छौँ”, उहाँले भन्नुभयो । महानगरका अनुसार रु २३ करोड ३२ लाख ७५ हजार एक सय ३९ को लागतमा वन निर्माण गरेको हो ।
त्यस अवसरमा अर्थमन्त्री रामेश्वरप्रसाद खनाल, ऊर्जा, जलस्रोत तथा सिँचाइमन्त्री कुलमान घिसिङ, उद्योग, वाणिज्य तथा आपूर्तिमन्त्री अनिलकुमार सिन्हा र सञ्चार तथा सूचना प्रविधिमन्त्री जगदीश खरेललगायतको उपस्थिति थियो । रासस
