काठमाडौँ । दीपक वलीको निर्देशनमा निर्माण हुन लागेको फिल्म ‘कामिनो’मा नीति शाह अनुबन्धित भएकी छन् । बुधबार निर्माण टिमले उनीसँग कागजी सम्झौता गरेको हो ।
फिल्ममा उनको जोडी अभिनेता प्रदीप खड्कासँग बाँधिनेछ । ‘कामिनो’मा प्रदीप र नीतिसँगै वर्षा सिवाकोटी र राजबल्लभ कोइराला पनि फाइनल भइसकेका छन् ।
जोखिमपूर्ण तरिकाले अमेरिका प्रवेश गर्न चाहनेको संघर्षको कथा फिल्मले भन्नेछ । यसको छायांकन आगामी चैतबाट सुरु हुनेछ । फिल्मका कार्यकारी निर्माता सुनिल विष्ट गौली रहेका छन् भने पटकथारसंवाद महेश दवाडीले लेखेका हुन् ।
सौरभ लामाको छायांकन, एसडि योगी र एलिस कार्कीको संगीत, सम्राट बस्नेतको द्वन्द्व निर्देशन रहेको फिल्मको बजेट तीन करोडभन्दा बढी रहेको छ ।
फिल्मलाई नेपाली, हिन्दी, अंग्रेजी र स्पेनिस गरी चार भाषामा रिलिज गर्ने तयारी गरिएको निर्माण पक्षले जनाएको छ ।
