काठमाडौँ । चन्द्रागिरि हिल्सका अध्यक्ष चन्द्र ढकालले चन्द्रागिरि केबलकारमा प्राविधिकरुपमा कुनै समस्या नभएको बताउनुभएको छ ।
चन्द्रागिरि हिल्सद्वारा शुक्रवार आयोजित पत्रकार सम्मेलनमा बोल्दै उहाँले यस्तो बताउनुभएको हो ।
उहाँले भन्नुभयो, ‘चन्द्रागिरि केबलकारमा कुनै प्राविधिक समस्या छैन । यो शतप्रतिशत सुरक्षित छ । कहिलेकाहीँ लोडसेडिङ हुँदा टेक्नोलोजीको हिसाबले केही समय रोकिने गरेको पक्कै छ । तर, लामो समयसम्म यस्तो समस्या रहँदैन । केही समस्या आएमा तत्कालै हामीले समाधान गर्दै आएका छौँ ’
प्राविधिक समस्या र यसको समाधानबारे सही सन्देश प्रवाह नभएका कारण कतिपय कन्फ्युजन देखिएको उहाँले बताउनुभयो ।
चन्द्रागिरि केबलकार तीन वटा सिस्टमबाट सञ्चालन हुने स्पष्ट पार्दै अध्यक्ष ढकालले भन्नुभयो, ‘हामीले विद्युत्, जेनेटर र इमरजेन्सी ड्राइभबाट केबलकार सञ्चालन गर्दछौँ । विद्युतबाट सञ्चालन भइरहेको अवस्थामा विद्युत् गएमा एक मेगावाटसम्मको क्षमतामा जेनेटरबाट चल्छ । यसमा पनि समस्या आएमा त्यसका लागि इमरजेन्सी ड्राइभ भन्ने छ त्यसबाट तत्कालै सञ्चालन गर्ने गर्छौँ ।’
शुक्रबार केबलकारलाई सुनियोजित रुपमा केहीबेर रोकाइएको थियो । प्राविधिक रुपमा केबलकार केही समय रोकिएपनि शतप्रतिशत सुरक्षित छ भन्ने कुराका लागि केबलकार केही समय रोकाइएको हो ।
