काठमाडौं । विद्यार्थीहरूमा अन्तरनिहित प्रतिभा प्रष्फुटन गराउन विभिन्न सहकार्यकलाप तथा अतिरिक्त क्रियाकलाप सञ्चालन गर्दै आएको दि एक्सेल्सियर स्कुलले यही भाद्र २७ र २८ गते नमुना संयुक्त राष्ट्रसंघ कार्यक्रम गरेको छ ।
कार्यक्रममा कक्षा ९ का विद्यार्थीहरूले अन्तराष्ट्रिय मानवअधिकार समिति , संयुक्त राष्ट्रसंघीय वातावरण कार्यव्रmम र विश्व स्वास्थ्य सङ्गठन गरी तीनओटा समितिहरूमा विभिन्न राष्ट्रहरूका प्रतिनिधिहरूको भूमिका निर्वाह गरेका थिए । मानवअधिकार समितिमा जातीयताले विश्वमा पारेको प्रभाव र यसको समाधानका लागि भएका प्रयासहरूको बारेमा छलफल गरेका थिए ।
संयुक्त राष्ट्र सङ्घीय वातावरणकार्यक्रममा जलवायु परिवर्तनका असर न्यूनीकरण गर्ने उपाय बारे गहन छलफल भएको थियो भने विश्व स्वास्थ्य सङ्गठन समितिमा विद्यार्थीहरूले विभिन्न देशका प्रतिनिधिहरूले वर्तमान कोरोना महामारी नियन्त्रणमा स्वास्थ्य मापदण्डको पालना तथा खोपको प्रभावकारी वितरणका बारेमा छलफल गरी माहामारीको नियन्त्रणमा आगामी दिनमा गर्नुपर्ने कार्य बारे निर्णयमा पुगेका थिए ।
यसैगरी कक्षा ८ का विद्यार्थीहरूले नेपालको प्रतिनिधि सभाको नमुना अभ्यास गरेका थिए । उनीहरूले नेपालका राष्ट्रिय दलका सांसदहरूको भूमिका निर्वाह गरेका थिए । उनीहरूले वर्तमान कोरोना महामारीले नेपालमा पारेको बहुआयामिक असर र यसको न्यूनीकरणका विविध पक्षमाथि छलफल गरेका थिए । साथै उनीहरूले कोरोना महामारीमा सरकारले खेल्नुपर्ने भूमिकाका विषयमा पनि छलफल गरी निर्णय गरेका थिए । विषयवस्तु माथिको छलफल निकै रोचक थियो ।
सामाजिक अध्ययन विभागको समन्वयमा भएको कार्यक्रमको आयोजना र सञ्चालन कक्षा १० का विद्यार्थीहरूले गरेका थिए । उनीहरूले समितिमा सभापति, उपसभापति तथा महासचिवको भूमिकाका अतिरिक्त पत्रकार, कार्टुनिष्ट, फोटोग्राफरको भूमिका पनि निर्वाह गरेका थिए । वेवसाइट निर्माण गर्ने, समितिमा भएका छलफलका विषय र निष्कर्ष वेवसाइटका माध्यमबाट जानकारी गराउने, भिडियो निर्माण गर्ने कार्यमा उनीहरूको सक्रिय सहभागिता थियो ।
कार्यक्रममा विद्यार्थीहरूले गरेको कामको मूल्याङ्कन सामाजिक अध्ययन विषयको प्रयोगात्मक शीर्षक अन्तर्गत रहने जानकारी गराइएको थियो । विद्यार्थीहरूद्वारा विद्यार्थीका लागि आयोजना भएको यो कार्यक्रम निकै उपयोगी भएको बिद्यालयका प्रधानाध्यापक प्रशान्त रजकले बताउनु भयो । उहाँले भन्नुभयो "विद्यार्थीहरूमा नेतृत्व क्षमताको विकास, जल्दाबल्दा समसामयिक विषयको ज्ञान, तार्किक क्षमताको विकास, कुटनीतिक मर्यादाको पालना, समस्याको पहिचान तथा समाधानका उपायको खोजी गर्ने क्षमताको विकास जस्ता व्यवहारिक सिपहरूको विकास गरी उनीहरूलाई विश्व परिवेशमा परिचित गराउन यो कार्यक्रम निकै उपयोगी भयो ।"
कोरोना महामारीका बिच भर्चुअल माध्यमबाट सञ्चालन भएको यो कार्यक्रमको सफलताले विद्यार्थी तथा शिक्षकको भौतिक उपस्थितिविना पनि विभिन्न कार्यक्रमका माध्यमबाट विद्यार्थीको सिकाइ सहजीकरण तथा व्यक्तित्व विकासका क्रियाकलाप गर्न सकिन्छ भन्ने सन्देश दिएको कार्यक्रमका संयोजक शिक्षक गोबिन्द गौतमले बताउनु भयो ।
