काठमाडौं । नेत्रवीक्रम चन्द ‘विप्लव’ नेतृत्वको नेकपाको केन्द्रीय समितिको बैठक आजदेखि तनहुँको पर्यटकीय नगरी बन्दीपुरमा सुरु भएको छ ।
बैठकमा सहभागी हुन सो पार्टीका महासचिव विप्लव बिहीबार बन्दीपुर आइपुग्नुभएको थियो ।
असोज ५ सम्म चल्ने केन्द्रीय कमिटी बैठकमा समसामयिक एजेण्डा, भावी रणनीतिका विषयमा छलफल गरिनेछ ।
सरकारले प्रतिबन्ध फुकुवा गरेपछिको यो पहिलो केन्द्रीय कमिटी बैठक रहेको छ।
अहिले पनि विप्लव नेतृत्वको नेकपाका झण्डै एक सय ५० कार्यकर्ता जेलमा छन् । नेकपाले उनीहरुको फुकुवाको माग गर्दै आएको छ ।
बैठकमा केन्द्रीय समितिका ७६ सदस्य सहभागी हुनेछन् । सो होटलमा केन्द्रीय सदस्यसहित नेताको सुरक्षाका लागि पार्टीका पूर्वजनमुक्ति सेनाका सदस्य र युवा गरी १५० जना बसेका छन् । बैठककक्षमा पत्रकारलाई प्रवेश नदिइने र बैठक अवधिभर कुनै पनि केन्द्रीय सदस्यले पत्रकारसँग कुरा गर्न नपाइने व्यवस्था गरिएको छ ।
बैठक सकिएपछि बन्दीपुरमा पार्टीका तर्फबाट नै पत्रकार सम्मेलन गरिने भएको छ ।
