चिनियाँ इन्जिनियरको कमाल, ५ तले भवन अर्को ठाउँ सारियो

  

तपाइँहरुले कहिल्यै भवन अन्यत्र सारेको देख्नु भएको छ ? चीनका इन्जिनियरहरुले यो काम सम्भव तुल्याएका छन् । चीनको शाङ्घाईमा सन् १९३५ अर्थात् ८५ वर्षअघि बनेको एउटा पाँच तले प्राथमिक विद्यालय भवनलाई अन्यत्र सार्न इन्जिनियरहरु सफल भएका हुन् । यो भवन झण्डै ७,६०० टन वजनको थियो । यसलाई आफ्नो मूल ठाउँबाट केही टाढा पु–याइएको थियो । यसका लागि भवनलाई पहिले ज्याकको सहायताले माथि उठाइएको र रोबोटिक विधिको प्रयोग गरी केही टाढा लगिएको थियो ।

भवन भत्काउन पनि सकिन्थ्यो

यो पुरानो भवनको छेउमा कमर्सियल कम्प्लेक्स र कार्यालय भवनहरु बनाउने योजना चालू थियो । तर निर्माण कार्य अघि बढ्दै जाँदा ठाउँको अभाव भयो । त्यसपछि विद्यालय भवन केही दूर सार्नुपर्ने वा भत्काउनु पर्ने अवस्था सिर्जना भयो । इन्जिनियरहरुले यो भवन भत्काउन पनि सक्थे, तर त्यसको बदलामा भवन नै केही टाढा सार्ने निर्णय गरेका थिए ।

१८ दिनमा यो काम सकियो

निकै ठूलो यस भवनलाई सबैभन्दा पहिले ज्याकको मद्दतले उचालियो । इन्जिनियरले निकै सुझबुझ देखाउँदै भवनलाई अन्यत्र सार्न रोबोटिक विधि अपनाउने निर्णय गरे ।

आखिर १८ दिनको मेहनत पश्चात भवनलाई झण्डै ६२ मिटर टाढा सार्न उनीहरु सफल भए । स्थानीय प्रशासनले यो भवनलाई ऐतिहासिक भवनको रुपमा संरक्षण गर्ने निर्णय गरेको छ ।

पहिलो पटक यो विधिको प्रयोग गरियो

भवनहरु एक ठाउँबाट अन्यत्र सार्ने काम विगतमा केही देशमा पनि हुने गरेको सुनिएको छ, र समाचारहरु आइरहेकै हुन्छन् । तर चीनमा यसपटक चक्का भएका रोबोटिक खुट्टाको प्रयोग गरिएको छ, र रिपोर्ट अनुसार यस्तो कार्य पहिलोपटक गरिएको हो । (स्रोतः सिसिटिभी, चीन)