एल क्लासिकोः रियल मड्रिडको शानदार जित, लिगको शीर्ष स्थानमा पकड

  

बार्सिलोना । बहुचर्चित एल क्लासिकोमा रियल मड्रिड र बार्सालोनाबीच भएको खेलमा रियल मड्रिडले शानदार जित हासिल गरेको छ ।

खेलमा रियलले बार्सिलोनालाई ३–१ ले हराउन सफल भएको हो । रियलका लागि पहिलो गोल भाल्भार्डेले करिम बेन्जिमाको सहयाेगमा खेलको पाँचौं मिनेटमै गोल गरे । तर बार्सलोनाले पनि रियललाई टक्कर स्वरुप खेलको आठौं मिनेटमै अन्सु फातीको गोलमा १-१ को बराबरीमा  ल्यायो ।

यो गोलसँगै फाती एल क्लासिकोमा गोल गर्ने सबैभन्दा कम उमेरका खेलाडी बनेका छन् । उनी अहिले १७ वर्षका मात्र छन् ।

खेल निकै नै रोमाञ्चक रुपमा अघि बढ्दै गर्दा रियलका लागि पहिलो पहेँलो कार्ड पाउने खेलाडी क्यासिमिरो भए । उनले खेलको १९ औं मिनेटमा पहिलो पहेँलो कार्ड पाएका थिए ।  त्यसैगरी बार्साका लागि पनि खेलको २९ औं मिनेटमा लेङ्लेटले पहिलो पहेँलो कार्ड पाए । 

पहिलो हाफ दुबै क्लब १-१ को गोलमै सीमित रह्यो । ।

दोस्रो हाफमा भने ६३ औं मिनेटमा रियलका कप्तान सर्जियो रामोसले पेनाल्टीलाई सदुपयोग गर्दै दोस्रो गोल गरे । त्यसपछि खेल २-१ को रोमाञ्चक मोडमा पुगेको थियो । 

त्यसैगरी खेलको ६९ औं मिनेटमा रियलका लागि पहिलो गोलकर्ता भाल्भार्डे खेलबाट बाहिर निस्के र उनको सट्टामा मैदानमा लुका मोड्रिज प्रवेश गरे ।  

यता बार्साका लागि पनि मैदानमा फाती र पेड्रिको सट्टामा ग्रिजमन र ट्रिनकाओले मैदानमा ८१ औं मिनेटमा मैदान प्रवेश गरे । खेल अझै रोमाञ्चक मोडमा पुगेको थियो । एल क्लासिकोको यो खेल हेर्नको लागि विश्वभरका फुटबल प्रेमीहरु आतुर थिए ।

खेलमा कसले जित हासिल गर्ने भन्नेबारेमा सबैले आ-आफ्नो अनुमान लगाएर खेल हेरिरहेका थिए । खेल ला लिगाको आधिकारिक फेसबुक पेजबाट प्रत्यक्ष प्रशारण गरिएकाे थियो । तर अन्तिम ९० औं मिनेटमा लुका मोड्रीचले गोल गर्दै बार्सिलोनामाथि ३–१ को शानदार जित दर्ता गर्न सफल भए । 

बार्सिलोनामाथि शानदार जित दर्ता गर्दै ६ खेल खेलेको रियल मड्रिड १३ अंकसहित ला लिगाको शीर्ष स्थानमा उक्लिएको छ ।

लिगको दसौं स्थानमा रहेको बार्सिलोनाले ५ खेल खेल्दै सात अंक जोडेको छ । ६ खेल खेलिसकेकाे रियलले ४ खेलमा जित हासिल गरेको छ भने एक खेलमा बराबरी र अर्को एक खेलमा भने हार बेहोरेको छ ।