ललितपुरको पुल्चोक देखि सोह्रखुट्टे पाटीसम्म यसरी तानियो मत्स्येन्द्रनाथको रथ, हेरौ यी तस्विर

  

काठमाडौं । रातो मत्स्येन्द्रनाथको रथ आज (आइतबार) दिउसो तानिएको छ । 

रथ रहेको स्थान ललितपुरको पुल्चोक देखि केही पर सोह्रखुट्टे पाटी सम्म तानिएको हो । परम्पराअनुसार पुल्चोकबाट गाःबहाल क्षेत्रमा रथ पुर्याउनुपर्छ । तर यस वर्ष कोभिड १९ महामारीका कारण रथलाई केही पर सम्म मात्रै तानिएको ललितपुर महानगरपालिकाका प्रमुख चिरिबाबु महर्जनले बताउनुभयो । महर्जतले कोभिड महामारीको कारणले गर्दा रथ यात्रामा परिवर्तन गरिएको बताउनुभयो । रथलाई ६÷७ किलोमिटर सम्म (बुङमती) नपुर्याई अलिकपत तानेर टुङ्ग्याउने योजना अनुसार आज तानिएको महर्जनले बताउनुभयो । उहाँले भदौ २६ गते उपयुक्त साइतमा रातो मत्स्येन्द्रनाथको मुर्तिलाई अवतरण गराई बुङ्मति लगिने कार्यक्रम तय भइसकेको बताउनुभयो । त्यसको चार दिन पछि भदौ २९ गते विशेष पूजाआजा गरी जात्रा पर्व समाप्त गरिने पनि उहाँले बताउनुभयो । 

यस वर्ष नरिवल खसाल्ने र भोटो देखाउने कार्यक्रम भने आयोजना हुने छैन । रथ तान्ने कार्यक्रमका लागि ४ सय ३४ जना सहभागि भएका थिए । जसमध्ये १ सय ६० जना रथ तान्नका लागि, १ सय २४ जना स्वयंसेवक, करिब ३० जना बाजागाजा बनाउने र ज्यापु समाजका पदाधिकारी गरि करिब साडे तीन सय जना मानिसहरु रथ तान्ने कार्यक्रममा भेला भएका थिए । प्रहरीले कार्यक्रम स्थललाई चारै तर्फबाट घेरा हालेर सुरक्षा दिएको थियो । गत बिहीबार स्थानीय केही युवाहरुले प्रशासनको अनुमति बिना रथ तान्न थालेपछि विवाद भएको थियो । यस्तै रथ यात्रा गर्न शुक्रबार क्षमा पूजा समेत गरिएको थियो ।