पत्रकारकाे भेषमा पुल्चाेकमा प्रहरीमाथि ढुंगा हान्ने युवक पक्राउ

  

तस्वीरः सामाजिक संजाल

काठमाडौं । पुल्चोकमा बिहीबार मच्छिन्द्रनाथको रथ तान्ने स्थानीय युवक र प्रहरीसँगको झडपमा प्रहरीलाई ढुंगा हान्ने थप एक युवकलाई प्रहरीले पक्राउ गरेको छ ।

प्रेस लेखेको ज्याकेट लगाएका र हातमा क्यामेरा बोकेर प्रहरीतर्फ ढुंगा हान्ने युवकलाई शुक्रबार अपराध महाशाखाको टोलीले पक्राउ गरेको हो । उनी महालक्ष्मी नगरपालिका– १ इमाडोलका २१ वर्षका अनिश महर्जन हुन् ।

उनी कुनै सञ्चार माध्यममा संलग्न नरहेको र प्रेस कार्ड पनि नभएको पाइएको अपराध महाशाखाले जनाएकाे छ । प्रहरीले बिहीबार मत्स्येन्द्रनाथको रथ तान्ने क्रममा प्रहरीलाई ढुंगामुढा गर्ने १३ जनालाई पक्राउ गरिसकेको छ ।

प्रेस लेखेकाे ज्याकेट लगाएर ढुंगामुढामा संलग्न रहेकाे भन्दै सामाजिक संजालमा पत्रकार र पत्रकारिता पेशाप्रति नै घृणा फैलाउने गरी आलाेचना भएकाे थियाे ।