अध्यक्षद्वय ओली र दाहालबीच छलफल, प्रधानमन्त्रीले दिएको काउन्टडाउन सुरु

  

काठमाडौं । पार्टी भित्रको अन्तरकलह बढ्दै गएपछि संवादहीन अवस्थामा पुगेका नेकपाका दुई अध्यक्ष केपी ओली र पुष्पकमल दाहालबीच बिहीबार करिब ४ घण्टा छलफल भएको छ । 

प्रधानमन्त्रीको सरकारी निवास बालुवाटारमा भएको छलफलमा दुई अध्यक्षबीच हिजोका दिनमा देखिएको बिमतिलाई कसरी सहजीकरण गर्ने भन्ने बारेमा छलफल भएको जनाइएको छ  । नेताहरुबीच छलफल चलिरहेको बेला बालुवाटार पुग्नु भएका महासचिव विष्णु पौडेल, नेताहरु शंकर पोखरेल तथा जनार्दन शर्मा भने छलफलमा सहभागी हुनु भएन  । 

स्रोतका अनुसार दुई शीर्ष नेताहरुबीच भएको छलफल बुँदागत रुपमा भएको छ ।  पार्टीलाई एकताबद्ध बनाउँदै हाल देखिएका समस्यालाई समाधान उन्मुख गर्न उहाँहरु गम्भीर हुनु भएको छ, सायद यसैको आधारमा प्रधानमन्त्रीले ५ दिनको काउन्टडाउन दिनु भएको हो, स्राेतले बतायाे ।

दुई शीर्ष नेताबीच भोलि पनि छलफल हुनेछ ।