बुद्धकाे जन्मस्थान नेपालकाे लुम्बिनी हाेः भारतीय विदेश मन्त्रालय

  

काठमाडौं । भारतीय विदेश मन्त्रालयले भगवान गौतम बुद्धको जन्मभूमि नेपालकाे लुम्बिनीमै भएकाे जनाएकाे छ ।

भारतीय विदेश मन्त्री एस जयशंकरको बुद्धकाे जन्म भारतमा भएकाे भन्दै विवादास्पद अभिव्यक्ति दिएपछि त्यसकाे चाैतर्फी विराेध भएकाे थियाे ।

जयशंकरको अभिव्यक्तिका बारेमा स्पष्ट गर्दै मन्त्रालयले उनकाे भनाइ साझा बौद्ध विरासतको सन्दर्भमा भएको बताएको छ । मन्त्रालयले जारी गरेकाे विज्ञप्तिमा प्रवक्ता अनुराग श्रीवास्तवले भनेका छन्,  ‘यसमा कुनै शंका छैन कि गौतम बुद्ध लुम्बिनीमा जन्मिएका हुन्, जुन नेपालमा पर्छ ।’

जयशंकरले एक भर्चुअल सम्मेलनमा बुद्ध महान भारतीय भएको बताएका थिए ।

प्रतिउत्तरमा नेपालको परराष्ट्र मन्त्रालयले बुद्धको जन्म नेपालमा भएको धेरै प्रमाण रहेको र त्यसलाई विश्वले स्वीकार गरेकाले बुद्धको जन्मभूमि बहसको विषय नभएको बताएको थियो ।