देवी प्याकुरेलको गजल

  

हलो,जुवा, कुटो कोदालोमा हलि भुलेको देखें । 
सुनौला धानका बाला लहलह झुलेको देखें ।

दर्केको छ पानी झमझम त्यो दुर गगनबाट 
बाउँसे रोपारेहरु निस्वार्थ प्रेममा खुलेको देखें ।

मानो रोपेर फल्दछ मुरी,गरे धावन्ती अनि श्रम
दंग हुने छ भकारी, खमार भरि सुनै चुलेको देखें ।

पालेका पशु पंक्षि रमेका छन् गोठ र खोर भरि भराउँ
कलिला पाडा,बाच्छाहरु खुशीले आगँनीमा डुलेको देखें ।

छन् सुन्दर प्रकृति छटाहरु तराई, पहाड हिमालको
गोठालाहरुको शिरै भरि असारे फुलै फुलेको देखें ।