पोग्बा, ओजिल र नेमारले क्लब छाड्ने सम्भावना

  

पल पाेग्बा (फाइल तस्वीर)

लन्डनः युरोपेली फुटबल लिगमा राम्रो प्रभाव पार्न सफल फ्रेन्च मिलफिल्डर पल पोग्बा, जर्मन मिडफिल्डर मेसट ओजिल र ब्राजिली फरवार्ड नेमारले आआफ्ना क्लबबाट बिदा हुने तयारीमा रहेका चर्चा हुन थालेको छ ।

हुनत म्यान्चेस्टर युनाइटेडका फरवार्ड पोग्बाले लामो समयदेखि क्लब छाड्ने चर्चा हुने गरेको थियो । प्रिमियर लिगमा कमजोर प्रदर्शन गरिरहेको युनाइटेडका खेलहरुमा चोटका कारण लामो समयदेखि खेल्न नसकेका पोग्बालाई बिक्री गर्न युनाइटेड आफैं उत्सुक देखिएको छ ।

२७ वर्षीय पोग्बालाई खरिद गर्न इच्छुक रियल म्याड्रिडले युनाइटेडसँग प्रस्ताव गर्न लागेको स्पेनी अखबार मुन्डो डिपोर्टिभोले लेखेको छ ।

यस्तै एट्लेटिको म्याड्रिडका मिडफिल्डर थोमस पार्टीले त आफू आर्सनल जान इच्छा देखाइसकेका छन् ।

टर्कीको क्लब फानरबाखले आर्सनलमा रहेका जर्मन मिडफिल्डर ३१ वर्षीय मेसट ओजिललाई अर्को वर्षका लागि क्लबमा ल्याउन चाहेको सन पत्रिकाले जनाएको छ ।

उता पेरिस सेन्ट–जर्मेनमा खासै बस्न इच्छुक नदेखिएका ब्राजिली फरवार्ड नेमार पुनः स्पेनी क्लब बार्सिलोना फर्कन इच्छुक रहेको मुन्डो डिपोर्टिभोले जनाएको छ । २८ वर्षीय फरवार्ड नेमार स्पेन जानेक्रममा आफ्नो शुल्कमा ५० प्रतिशत कटौती गर्न पनि राजी भएको बताइएको छ ।

आर्सनल र चेल्सी दुबै टिम टर्कीका मिडफिल्डर १९ वर्षीय ओर्कुन कोकुलाई टिममा ल्याउन संघर्षरत छन् ।