काठमाडौँ । होबार्ट हरिकेन्स बिग ब्यास लिग (बीबीएल)को १४ औं सिजनको फाइनलमा पुग्ने पहिलो टोली बनेको छ । टोलीले ७ वर्षपछि फाइनलमा स्थान बनाएको हो ।

मंगलबार भएको छनोट खेलमा होबार्टले तीन पटकको च्याम्पियन सिड्नी सिक्सर्सलाई १२ रनले पराजित गरेको थियो । पावरप्लेमा २ विकेट लिने फास्ट बलर रिले मेरिडिथ प्लेयर अफ दि म्याच भए ।

होबार्टमा टस जितेर पहिले ब्याटिङ गरेको घरेलु टोलीले ७ विकेट गुमाएर १७३ रन बनाएको थियो । सुरुआती विकेट गुमाएपछि सिड्नीले पुनरागमन गरे पनि टोलीले ५ विकेट गुमाएर १६१ रन मात्रै बनाउन सक्यो । हरिकेन्सले अब फाइनल जनवरी २७ मा होबार्टमा खेल्नेछ ।

बेलेरिभ ओभलमा सिड्नीले टस जितेर बलिङ रोजेको थियो । होबार्टले ओपनर मिचेल ओवेन र कालेब जेवेलबाट द्रुत सुरुवात पायो । दुवैले ४ ओभरमा ४७ रनको साझेदारी गरे । ओभेल ३६ रन बनाएर आउट भए, उनीपछि म्याथ्यु वेड पनि ४ रन बनाएर प्याभिलियन फर्किए ।

त्यसपछि बेन म्याकडर्मोटले कालेव जेवेलसँग तेस्रो विकेटका लागि ५० रनको साझेदारी गरे । जेवेल ४० रन बनाएर आउट भए । अन्त्यमा म्याकडर्मोटले ४२, टिम डेभिडले २५ र निखिल चौधरीले १४ रन बनाएर स्कोर १७३ रनमा पुर्याएका थिए ।

सिड्नीका बेन द्वारस र जाफर चौहानले २–२ विकेट लिए । ज्याक एडवर्ड्स र मिचेल पेरीले १–१ विकेट लिए ।

१७४ रनको लक्ष्य पछ्याउने क्रममा सिड्नी सिक्सर्सको सुरुवात खराब रह्यो । टोलीले मात्र ५ रनमा ३ विकेट गुमाएको थियो । कप्तान मोइसेज हेनरिकेसले १ रन मात्र बनाउन सके भने जोस फिलिप र ज्याक एडवर्ड्सले खाता पनि खोल्न सकेनन् । पावरप्लेमा होबार्टका मेरिडिथले २ र क्यामरुन गाननले १ विकेट लिए ।

५ विकेटको प्रारम्भिक पतन पछि, ओपनर कर्टिस प्याटरसनले जोर्डन सिल्कसँग इनिङ्स सम्हाले । प्याटरसन ४८ रन बनाएर आउट हुँदा दुवैले ७५ रनको साझेदारी गरेका थिए । त्यसपछि सिल्कले लाचलन शसँग ६४ रनको साझेदारी गरे । सिल्क ५७ रन बनाएर आउट भए ।

लाचलन र बेन द्वारसिसले अन्ततः टोलीलाई जित दिलाउन प्रयास गरे, तर लक्ष्य धेरै ठूलो साबित भयो । द्वारसिसले १६ रन बनाएर नटआउट रहे भने लाचलनले ३३ रनमा नटआउट रहे पनि टोलीले ५ विकेट गुमाएर १६१ रन मात्रै बनाउन सक्यो । होबार्टका मेरिडिथ र ग्याननले २–२ विकेट लिए । एउटा सफलता कप्तान नाथन एलिसलाई गयो ।

क्वालिफायर जितेर होबार्टले घरेलु मैदानमा फाइनल खेल्ने पक्का गरेको छ । टोलीले अब उपाधिका लागि जनवरी २७ मा खेल्नेछ । सिड्नी टोलीले च्यालेन्जरमा नकआउट जित्ने टोलीसँग जनवरी २४ मा आफ्नै घरेलु मैदानमा सामना गर्नेछ । नकआउटमा मेलबर्न स्टार्सले सिड्नी थन्डरको सामना गर्दैछ ।