काठमाडौँ । कीर्तिमानी आरोही सानु शेर्पालाई संस्कृति, पर्यटन तथा नागरिक उड्डयन मन्त्रालयले सम्मान गरेको छ ।

आरोही शेर्पालाई संस्कृति, पर्यटन तथा नागरिक उड्डयनमन्त्री जीवनराम श्रेष्ठले आज (बुधवार) मन्त्रालयमा नै बोलाएर सम्मान गर्नुभएको हो । उहाँले एक महिनाको आफ्नो मन्त्रीको तलव सम्मान स्वरुप ७० हजार ७ सय ३० रुपैयाँ बराबरको चेक हस्तान्तरण गर्नुभयो ।

सम्मान कार्यक्रमपछि बोल्दै पर्यटनमन्त्री श्रेष्ठले हिमाल आरोहण गर्नेकुरा कम चुनौतिको विषय नभएको बताउनु भयो । उहाँले आरोही शेर्पाले ८ हजार मिटर भन्दा अग्ला १४ वटा हिमाल दुई/दुई पटक आरोहण गरेर विश्व कीर्तिमानी कायम गर्नुभएको उपलक्ष्यमा आफूले उहाँको सम्मानस्वरुप एक महिनाको तलव हस्तान्तरण गरेको बताउनु भयो ।

मन्त्री श्रेष्ठले सगरमाथा आरोहण गर्ने व्यक्तिलाई अन्य देशमा देशको गौरवको रुपमा सम्मान दिने गरिएपनि नेपालमा भने त्यत्ति चासो नदिएको आरोप लगाउनु भयो । आरोही शेर्पाले अहिलेसम्म ७ पटक विश्वको सर्वोच्च शिखर सगरमाथाको सफल आरोहण गर्नुभएको छ ।

उहाँले भन्नुभयो, ‘हिमाल आरोहण गर्नेकुरा कम चुनौतिको विषय होइन । कठिन विषय हो । हाम्रोमा धेरै छिटो, बिना अक्सिजन हिमाल आरोहण गर्नेकुरा भएकाले यो विषयले त्यत्ति महत्व नपाएको होला तर विश्वका १४ अग्ला हिमालहरु दुई, दुई पटक आरोहण गरेर विश्व रेकर्ड राख्नु चानचुने कुरा होइन । अरु देशमा सगरमाथा आरोहण गर्ने व्यक्ति एउटा त्यो देशका लागि हिरो हुन्छ ।’

‘देशका लागि नै गौरवको विषय बन्छ । त्यसैले हामीले यस्ता विश्व कीर्तिमानी कायम गर्ने व्यक्तिहरुको सम्मान गर्न आवश्यक छ । हामीले आरोहणको विषयलाई त्यत्ति धेरै महत्व नदिएको हो कि जस्तो लाग्यो । आरोहणको पर्यटन क्षेत्रमा र विश्वकै सामु जुन एउटा महत्व छ त्यसलाई हामीले बिर्सिनु हुँदैन । सगरमाथाको आरोहण गर्ने व्यक्तिले आफ्नो पहिचान बनाइरहेको छ । उहाँले ७ पटक त सगरमाथा नै आरोहण गर्नुभएको छ । हाम्रो देश समृद्ध देश भएको भए यो विषय विश्वकै महत्वपूर्ण कुरा बन्थ्यो । सानु शेर्पाको विषयको चर्चा गरेको खण्डमा विश्वसामु नेपालको चर्चा झनै चुलिन्छ ।’

मन्त्री श्रेष्ठले कीर्तिमानी आरोही सानु शेर्पासहितका हिमाल आरोहीहरुको चर्चा विश्वमा गर्नसके पर्यटन क्षेत्रको प्रचारका साथै नेपालको छवि पनि विश्वमाझ पुग्ने बताउनु भयो ।

काठमाडौँ । दुई पटक गिनिज बुकमा नाम लेखाइसकेका र नेपाल भ्रमण वर्ष २०११ को सद्भावना दूतसमेत भइसकेका सफल हिमाल आरोही निमा ग्याल्जेन शेर्पालाई स्वागत र सम्मान गर्न उहाँका भाइ फुर्वा तेन्जिङ शेर्पाले अनुरोध गर्नुभएको छ ।

आरोही फुर्वाले एनएमए, टान, नेपाल पर्यटन बोर्ड, सगरमाथा आरोही संघ, पर्यटन विभागलगायतलाई ग्याल्जेनको स्वागत सम्मान र कदर गर्न ध्यानाकर्षण गराउनुभएको हो ।

फुर्वाका अनुसार निमा ग्याल्जेनले विश्वका सबैभन्दा अग्ला १४ वटै हिमालको सफल आरोहण गर्ने दोलखा जिल्लाकै पहिलो आरोही हुनुभएको र केवल ४२ दिनमा पाकिस्तानस्थित आठ हजार मिटरका सबै हिमाल आरोहण गरी नयाँ विश्व कीर्तिमान कायम गर्नुभएको सामाजिक सञ्जालमार्फत उल्लेख गर्नुभएको छ ।

यसअघि पनि ग्याल्जेनले गिनिज बुकमा दुई पटक नाम लेखाउनु भएको र उहाँ हिमालमा रेस्क्यु गरी धेरैको ज्यान जोगाउने कुशल आरोही पनि रहेको फुर्वाले उल्लेख गर्नुभएको छ ।

फुर्वाका अनुसार ग्याल्जेनले हालसम्म सगरमाथा ९ पटक, मनास्लु ७ पटक, ल्होत्से र मकालु ३–३ पटक, चोयु र अन्नपूर्ण २–२ पटक र बाँकी के२, कञ्चनजंघा, धौलागिरि, नांगा पर्वत, जि१, जि२, ब्रोड पिक, सिसापाङ्मा हिमालहरु १–१ पटक आरोहण गर्नुभएको छ । साथै दोलखा स्थित लिंकुचुली २ ९६,६५९ मिटर० हिमाल आरोहण गर्ने प्रथम आरोही पनि हुनुहुन्छ ।