काठमाडाैँ । प्रतिनिधिसभा बैठकमा नीति तथा कार्यक्रममाथि छलफल गर्ने प्रस्ताव प्रस्तुत गर्ने क्रममा प्रधानमन्त्री अनुपस्थित भएपछि संसद्मा असहज स्थिति सिर्जना भएको छ। सोही घटनाक्रमपछि श्रम संस्कृति पार्टीका अध्यक्ष हर्क साम्पाङले बैठक बहिष्कार गरेका छन्।

बैठकमा प्रधानमन्त्रीको सट्टा प्रस्ताव प्रस्तुत गर्ने जिम्मा स्वर्णिम वाग्लेले लिने तयारी गरिएको थियो। तर प्रधानमन्त्री अनुपस्थित रहेको विषयलाई लिएर असन्तुष्टि जनाउँदै हर्क साम्पाङले संसद्भित्रै उठेर राजीनामाको माग गरेका थिए।

सभामुखले प्रमुख प्रतिपक्षी दललाई बोल्ने समय उपलब्ध गराउने प्रयास गरे पनि परिस्थिति सहज हुन नसकेपछि साम्पाङ बैठकबाट बाहिरिएका हुन्। घटनापछि संसद् बैठक केहीबेर तनावपूर्ण बनेको थियो।

नीति तथा कार्यक्रममाथिको छलफल प्रक्रिया भने अन्य सांसदहरूको सहभागितासहित अघि बढाइएको बताइएको छ।

काठमाडौं। श्रम संस्कृति पार्टीले प्रतिनिधिसभाको उपसभामुखमा दाबी गर्ने भएको छ ।

पार्टी अध्यक्ष हर्क साम्पाङले समाजिक सञ्जालमार्फत आफ्नो पार्टीले उपसभामुखमा महिला सांसदलाई उम्मेदवार बनाउन लागेको बताएका छन् ।

सामाजिक सञ्जालमा उनले लेखेका छन्– ‘सभामुख निर्विरोध चयन हुनु भएकोमा बधाई दिइसक्यौँ अब उपसभामुख चयनको निर्वाचन हुँदैछ । हामी महिला उम्मेदवार खडा गर्दैछौँ । हेरौँ नयाँले नयाँलाई भोट हाल्छ कि उही पुरानालाई! ७ भोट आउँछ कि १८९ ?

काठमाडौं । श्रम संस्कृति पार्टीका अध्यक्ष हर्क साम्पाङले समानुपातिक सांसद बनाइदिन अनुरोध गर्दे उम्मेदवारहरुले दवाब दिएपछि आफ्नो दिक्दारी सामाजिक संञ्जाल मार्फत व्यक्त गर्नुभएको छ ।

निर्वाचन आयोगले तीन दिन भित्र नाम सिफारिस गर्न समय दिएकै दिन साम्पाङले यस्तो दिक्दारी पोख्नु भएको हो ।

उहाँले बिहीबार राति करिब ८ बजेतिर लेख्नुभयो ‘भात खाऊ मेरो टाउको नखाऊ’

यसैगरी राती १० बजे लेख्नुभयो ‘अब उप्रान्त समानुपातिकको विषयमा रोइलो गर्ने जति सबैलाई साधारण सदस्य समेत नरहने गरी पार्टीबाट निस्कासन गर्नेछु ! हद भो !!!’

राष्ट्रिय पार्टी बन्न सफल साम्पाङ नेतृत्वको दल श्रम संस्कृति पार्टीले प्रतिनिधिसभा चुनावमा प्रत्यक्षतर्फ ३ सिट जितेको छ। यो दलले समानुपातिकमा ४ जना सांसद पाउने छ।

विराटनगर । सुनसरी १ बाट श्रम संस्कृति पार्टीका अध्यक्ष हर्क साम्पाङ विजयी हुनु भएको छ ।

साम्पाङले ३५ हजार ७४१ मत प्राप्त गर्नुभयो भने उनका निकटतम प्रतिस्पर्धी रास्वपाकी गोमा तामाङले २७ हजार २४९ मत प्राप्त गर्नुभयो । एमालेका उम्मेदवार टिका मांगलेनले ६ हजार ३३१ मत ,नेपाली कम्युनिस्ट पार्टीका उम्मेदवार सूर्य भट्टराईले ६ हजार २५८ मत प्राप्त गर्नुभयो ।

यस क्षेत्रमा विभिन्न १९ दल र सात स्वतन्त्र गरी २६ जना उम्मेदवार चुनावी प्रतिस्पर्धामा हुनुहुन्थ्यो । धरान उपमहानगरपालिका, बराहक्षेत्र, राधुनी गरी २७ वटा वडा समेटिएको यस निर्वाचन क्षेत्रमा एक लाख ५० हजार ३९३ मतदाता रहेकामा ८७ हजार ८६५ मत खसेको थियो ।

काठमाडौं । सुनसरी–१ का उम्मेदवार तथा श्रम संस्कृति पार्टीका अध्यक्ष हर्क साम्पाङविरुद्ध निर्वाचन आयोगमा उजुरी परेको छ।

चुनावी प्रचारप्रसारका क्रममा बालबालिकाको प्रयोग गरेको आरोप लगाउँदै उजुरी दर्ता गरिएको हो।

धरान नगर बाल सञ्जालले साम्पाङविरुद्ध जिल्ला प्रहरी कार्यालय सुनसरी र निर्वाचन अधिकृतको कार्यालयमा उजुरी दिएको हो।

उजुरीमा बालबालिका ऐन, २०७५ को परिच्छेद २, दफा ७ को उपदफा ९ अनुसार बालबालिकालाई प्रत्यक्ष वा अप्रत्यक्ष रूपमा राजनीतिक उद्देश्यका लागि प्रयोग गर्न नपाइने व्यवस्था रहेको उल्लेख गरिएको छ। तर उम्मेदवार साम्पाङले उक्त कानुनी प्रावधान उल्लंघन गरेको आरोप सञ्जालले लगाएको छ।

धरान नगर बाल सञ्जालले साम्पाङलाई निर्वाचन अधिकृतको कार्यालयमा उपस्थित गराई यस विषयमा छलफल गर्न तथा आचारसंहिता उल्लंघन गरेबापत आवश्यक कारबाही गर्न माग गरेको छ।

बालबालिकाको प्रयोग गरेको आरोप प्रमाणित भएमा कानुनअनुसार एक लाख रुपैयाँसम्म जरिवाना र उम्मेदवारी दर्ता खारेजसमेत हुन सक्ने व्यवस्था रहेको छ।

दमौली । श्रम संस्कृति पार्टीका अध्यक्ष हर्क साम्पाङले श्रम नगरी देश विकास हुन नसक्ने बताउनुभएको छ । तनहुँको आँबुखैरेनीमा आज स्थानीयसँग भेटघाट गर्दै अध्यक्ष साम्पाङले गफले मात्रै मुलुक नबन्ने बताउँदै त्यसका लागि श्रम अनिवार्य रहेको बताउनुभयो ।

गफभन्दा श्रमलाई प्राथमिकता दिने पार्टी आफ्नो मात्रै रहेको दाबी गर्दै साम्पाङले सबै जनता उत्पादनशील काममा जोडिनुपर्ने उल्लेख गर्नुभयो । उहाँले भन्नुभयो, “काम नगरेर देश नबनेको हो । काम गर्ने मानिसलाई अपमान गर्ने प्रवृत्ति छ । श्रम गरेर देशलाई स्वाधीन बनाउनुपर्छ ।”

अध्यक्ष साम्पाङले राजनीतिक दलहरू विकासका नाममा भाषण र आश्वासनमै सीमित भएको आरोप लगाउँदै आफ्नो पार्टीले श्रमलाई व्यवहारमै उतारेको दाबी गर्नुभयो । “काम नगरेर देश बनेको छैन । हामी कहाँ काम गर्ने मानिसलाई हेप्ने र गफ गर्ने मानिसलाई सम्मान गर्ने गलत संस्कार छ,” उहाँले भन्नुभयो, “यो सोच बदल्न सकेनौँ भने देश कहिल्यै अगाडि बढ्दैन ।”

उहाँले देशका सबै नागरिकलाई उत्पादनशील काममा जोड्न नसक्दासम्म बेरोजगारी, गरिबी र परनिर्भरताको समस्या समाधान नहुने बताउनुभयो । विशेषगरी युवाहरू श्रमबाट टाढा रहँदा ठूलो जनशक्ति विदेशिन बाध्य भएको उहाँको भनाइ थियो ।

अध्यक्ष साम्पाङले विदेशी सहयोग र अनुदानले मात्र देश नबन्ने स्पष्ट पार्दै आफ्नै श्रम र स्रोतको सदुपयोगमार्फत विकास गर्नुपर्नेमा जोड दिनुभयो । “विदेशी आएर हाम्रो देश बनाई दिँदैनन् । आफ्नो देश आफैँले बनाउने हो,” उहाँले भन्नुभयो, “श्रमलाई मूल आधार मानेर हामी अघि बढेका छौँ ।”

काठमाडौं : काठमाडौं महानगरपालिकाका प्रमुख बालेन्द्र (बालेन) साह, भरतपुर महानगरपालीका प्रमुख रेणु दाहाल र धरान उपमहानगरपालिकाको प्रमुख हर्कराज राई (हर्क साम्पाङ) पदबाट राजीनामा दिएर आज बाट चुनावी अभियानमा होमिँदै छन् ।

रास्वपाले भावि प्रधानमन्त्रीका रूपमा अघि सारेका शाह झापा ५ बाट उम्मेदवार बन्ने तयारीमा छन। यसै गरी नेपाली कम्युष्टि पार्टीका तर्फबाट दाहाल चितवन ३ बाट उम्मेदवार बन्ने तयारीमा हुनुहुन्छ । राई श्रम संस्कृति पार्टीबाट सुनसरी १ मा उम्मेदवार बन्ने तयारीमा हुनुहुन्छ ।

बालेन शाहले आज काठमाडौ महानगरपालीका प्रमुखबाट राजीनामा दिने र रास्वपाको पार्टी कार्यालय बनस्थली आउने र भोली माघ ५ गते जनकपुरबाट चुनाव केन्द्रीत यात्रामा निस्किने तयारी गर्नुभएको छ ।

धरान । देशको दिगो विकासका लागि श्रमदान अपरिहार्य भएको श्रम संस्कृति पार्टीका अध्यक्ष हर्कराज साम्पाङ राईले बताउनुभएको छ ।

धरान उपमहानगरका प्रमुख समेत रहनुभएका उहाँले आज धरानमा पार्टीको घोषणापत्र तथा एजेन्डा सार्वजनिक गर्दै भन्नुभयो, “जनतालाई देश र माटोसँग जोड्नु आवश्यक छ । केवल योजनाबद्ध काम र बजेटमा निर्भर रहँदा विकास ढिलो हुन्छ । छिटो विकासका लागि श्रमदान अपरिहार्य छ ।”

श्रमदानबाट विकास गर्दा जनता आफैँ संलग्न हुने उहाँको भनाइ छ । देशको दिगो विकासलाई मध्यनजर गर्दै श्रम संस्कृति पार्टी स्थापना गरिएको उहाँले स्पष्ट पार्नुभयो । अध्यक्ष राईले भन्नुभयो, “पार्टीको उद्देश्य केवल श्रमलाई मूल्याङ्कन गर्नु मात्र नभइ, श्रम गर्ने श्रमिकलाई न्याय दिने प्रयास निरन्तर रहिरहने प्रतिबद्धतासमेत व्यक्त गर्दछु ।”

सङ्खुवासभा। श्रम संस्कृति पार्टीका अध्यक्ष हर्क साम्पाङले आगामी निर्वाचनमा आफ्नो नेतृत्वमा नयाँ राजनीतिक शक्ति उदाउने दाबी गर्नुभएको छ ।

आज यहाँको खाँदबारीमा आयोजित सङ्गठन बिस्तार तथा जागरण सभामा उहाँले विगतका वर्षमा देखिएको राजनीतिक अस्थिरता, भ्रष्टाचार र सरकारी असफलताबाट जनताले वैकल्पिक शक्तिको खोजी गरेको बताउनुभयो ।

अध्यक्ष साम्पाङले पार्टीले त्यही विकल्पका रूपमा अघि बढिरहेकाले पार्टीले जनसमर्थनसहित उल्लेख्य सफलता हासिल गर्ने जिकिर गर्नुभयो ।

आफ्नो पार्टी प्रत्यक्ष कार्यकारी प्रधानमन्त्री पद्धतिको पक्षमा रहेको बताउँदै उहाँले भ्रष्टाचारविरुद्ध कठोर नीति अपनाउने बताउनुभयो । “भ्रष्टाचार गर्दिनँ, गर्न पनि दिइने छैन ।

हाम्रो सरकार सुशासन, पारदर्शिता र मितव्ययितामा आधारित हुनेछ”, अध्यक्ष साम्पाङले भन्नुभयो,“उत्पादन र निर्माणलाई प्राथमिकतामा राखेर देश आर्थिक रूपमा सक्षम बनाउने लक्ष्य पार्टीले लिएको छ । उत्पादनमा वृद्धि गर्न नसक्दा ठूलो सङ्ख्यामा नेपाली बेरोजगार बन्नु परेको पीडा हामीलाई थाहा छ ।”

उहाँले गाउँगाउँमा सङ्गठन बलियो बनाउँदै सामाजिक र आर्थिक रूपान्तरणमा जुट्ने बताउनुभयो । रासस

काठमाडौँ ।  श्रम संस्कृति पार्टीका अध्यक्ष एवं धरान उपमहानगरपालिकाकाका प्रमुख(मेयर) हर्क साम्पाङको गफले मात्रै रोजगारी सिर्जना नहुने बताउनुभएको छ ।

आईतवार निर्वाचन आयोगले श्रम संस्कृति पार्टीलाई दिएको मान्यताको प्रमाणपत्र बुझ्दै उहाँले यस्तो बताउनुभएको हो । उहाँले रोजगारी सिर्जनाको लागि उत्पादन बढाउनुपर्ने बताउनु भयो । श्रम संस्कृति पार्टीले उत्पादन, निर्माण, सामाजिक रुपान्तरण र आर्थिक रुपान्तरणको लागि फिल्डमा खटेर काम गर्ने उहाँको भनाई छ ।

उहाँले उत्पादन बढाउन नसक्दा प्रायः नेपाली बेरोजगार हुनुपरेको बताउनु भयो । उहाँले देश आफैँले बनाउने मौलिक शैली अपनाउने उल्लेख गर्नुभयो । देश विदेशी ऋणले मात्रै नचल्ने बताउनुहुँदै उहाँले देश अब नेपाली आँफैले बनाउनुपर्नेमा जोड दिनुभयो । उहाँले गरिबी, अभाव र यसकै कारणले हुने विभिन्न खालका ठगी, भ्रष्टाचार, बेइमानीलाई अन्त्य गर्ने बताउनु भयो ।

उहाँले भन्नुभयो, ‘जुन काम आजसम्म भएन, यत्तिका वर्षसम्म । त्यो काम गर्ने हो । उत्पादन, निर्माण, सामाजिक रपन्तरणका लागि, आर्थिक रुपान्तरणको लागी हामी अब फिल्डमा निस्केर काम गर्छौं । अफिसका बसेर भाषणमा सिमित हुँदैनौँ । हामी चाँही पक्का फिल्डका काम गर्ने एउटा संगठन निर्माण गर्दैछौँ । पहिला त यो देशमा काम गर्नुपर्छ । उत्पादन बढाउनुपर्छ । हामी सबै बेरोजगार छौँ प्रायः । रोजगारीको सिर्जना गफले हुँदैन । विदेशी ऋणले नी चल्दैन यो देश । त्यसले गर्दाखेरि यो देश अब हामी आँफैले बनाउनुपर्छ भन्ने हाम्रो मौलिक शैली छ । ती शैलीलाई हामीले विर्सियौँ । त्यो मौलिक शैलीहरुलाई पनि हामीले फेरि उजागर गर्छौ ।’

उहाँले आफूहरुले दलको झण्डा नराख्ने बताउनु भयो । दलको चुनाव चिन्ह भने माटोको ढिस्को राखिएको छ । लोकतन्त्रमा विश्वास राख्ने भएकोले आवधिक निर्वाचनमा पार्टीले भाग लिने उहाँको भनाई छ । निर्वाचनको लागि तयारी पनि भइरहेको उहाँले जानकारी दिनुभयो । उहाँले परम्परागत राजनीतिक दलजस्तो आफ्नो पार्टी नहुने पनि दाबी गर्नुभयो । हरेक टोलमा पार्टीले काम गर्ने श्रमदाता बनाउने उहाँले जानकारी दिनुभयो । निर्वाचन आयोगले साम्पाङको पार्टीलाई आईतवार मान्यता दिएको हो । साम्पाङले आईतवार आयोगमा पुगेर पार्टीको मान्यताको प्रमाणपत्र लिनुभएको छ ।

काठमाडौँ । धरान उपमहानगरपालिकाका मेयर हर्क साम्पाङको श्रम संस्कृति पार्टीलाई निर्वाचन आयोगले मान्यता दिएको छ ।

आइतबार मेयर साम्पाङले आयोगमा पुगेर पार्टीको मान्यताको प्रमाणपत्र लिएका हुन् ।

अन्तरिम सरकारले आगामी फागुन २१ गते प्रतिनिधिसभा निर्वाचनको मिती तोकिएको छ । सोका लागि नयाँ दलहरू दर्ता प्रक्रियामा छन् ।

काठमाडौँ । धरान उपमहानगरपालिकाका मेयर हर्क साम्पाङले काठमाडौँ महानगरपालिकाका मेयर बालेन साहलाई जवाफ फर्काएका छन् ।

हर्कले बालेनलाई लक्षित गर्दै लुकेर गेम खेल्दै स्टाटस लेख्नु सजिलो हुने बताएका हुन् ।

देशले के कति गुमायो त्यो थाहा छ ? भन्दै प्रश्न गरेर हर्कले देश रोएको बेला बालेन हाँस्दै बसेको आरोप समेत लगाएका छन् ।

यसअघि मेयर बालेनले हर्कलाई कटाक्ष गर्दै स्टाटस लेखेका थिए ।

काठमाडौँ । काठमाडौँ महानगरपालिकाका मेयर बालेन साहले धरान उपमहानगरपालिकाका मेयर हर्क साम्पाङलाई कटाक्ष गरेका छन् ।

बालेनले फेसबुकमा स्टाटस राख्दै आफूलाई जति गाली गरे पनि बालेनले माया गर्न नछोड्ने भन्दै कटाक्ष गरेका हुन् ।

उनले हर्कलाई ‘एक तर्फी नै सही, तर मेरो माया साँचो हो ।’ भन्दै व्यंग्य गरेका छन् ।

बालेनले लेखेका छन्ः
डियर हर्क साम्पाङ,
तिमीले मलाई जति गाली गरे पनि म तिमीलाई माया गर्न छोड्दिन । एक तर्फी नै सही, तर मेरो माया साँचो हो ।

You are my true love.

पछिल्लो समय हर्कले बालेनलाई लिएर एकपछि अर्को स्टाटस लेख्दै प्रहार गरिरहेका छन् ।

काठमाडौँ । धरान उपमहानगरपालिकाका मेयर हर्क साम्पाङले नगर अस्पतालको जग्गा फिर्ताका लागि स्वास्थ्य मन्त्रालयसमक्ष आग्रह गरेका छन् ।

जग्गा फिर्ताका लागि मन्त्रालयलाई पत्राचार गर्दै उनले भनेका छन्– ‘उपर्युक्त सम्बन्धमा धरान उपमहानगरपालिकाले आफ्नै नगर अस्पताल बनाउन चाहेको छ । छाता चोकमा रहेको पुरानो अस्पतालको जग्गा कुनचाहिँ कुलङ्घारले दलालीमा भुलेर बीपी अस्पताललाई दिइ पठाएछ थाहा भएन यसरी नगरपालिकाको जग्गा लान पाइँदैन । प्लिज फिर्ता गरिदिनु होला । धन्यवाद ।’

काठमाडौँ। नेपाली कांग्रेसका प्रचार विभाग प्रमुखसमेत रहेका केन्द्रीय सदस्य मीनबहादुर विश्वकर्मालाई धरान उपमहानगरपालिकाका मेयर हर्क साम्पाङले अख्तियार दुरूपयोग अनुसन्धान आयोगमा उजुरी दिएका छन्।

धरान खानेपानी योजनामा २४ करोड रुपैयाँको अनियमितता भएको आरोप लगाउँदै साम्पाङले विश्वकर्मामाथि छानबिनको माग गरेका हुन् ।

विश्वकर्माले एक टीभी अन्तर्वार्तामा एडीबीबाट ऋण र अनुदानमार्फत एक अर्ब ५० करोड रुपैयाँ ल्याएर धरानमा खानेपानी योजना सञ्चालन गरेको बताए पनि उपमहानरको लेखा शाखाले उक अर्ब २८ करोड ६ लाख ७५ हजार ६२१ रुपैयाँ मात्रै खर्च गरेको साम्पाङको उजुरीमा छ । बाँकी २१ करोड ९३ लाख २४ हजार ३७९ रुपैयाँ के, कसरी, कहाँ खर्च भयो त्यसको हिसाब विश्वकर्माले दिनुपर्ने साम्पाङको माग छ ।

काठमाडौँ । धरान उपमहानगरपालिकाका मेयर हर्क साम्पाङले अर्थमन्त्री विष्णुप्रसाद पौडेलसँग भेट गरेका छन् ।

रित्तो गाग्री लिएर काठमाडौँ आएका मेयर हर्कले मन्त्रालय पुगेर मन्त्री पौडेलसँग भेट गरेका हुन् ।

भेटका क्रममा उनले अर्थमन्त्रीसँग धरानमा खानेपानी समस्या समाधानका लागि सहयोग गर्न आग्रह गरेका थिए । यसअघि साम्पाङले आजै खानेपानी मन्त्री प्रदीप यादवसँग पनि भेट गरेका थिए ।

काठमाडौं । सरकारले धरानको खानेपानी समस्यालाई बेवास्ता गरेको गरेको भन्दै रित्तो गाग्री बोकेर काठमाडौं आएका मेयर हर्क सम्पाङ सिंहदरबारस्थित खानेपानी मन्त्रालयमा पुगेका छन् ।

रित्तो गाग्रीसहित सिंहदरबार छिर्ने तयारी गरेका सम्पाङ खानेपानी मन्त्रालयभित्र गाग्रीविनै पुगेका छन् । गाग्रीसहित सिंहदरबार भित्रप्रवेश गर्न नपाइने भएकोले उनलाई सुरक्षाकर्मीले गाग्रीविनै प्रवेश गराएका हुन् ।

उनले यसअघि भानुचोकमा रितो गाग्री बोकेर प्रदर्शन गरेका थिए । खानेपानीको अभाव झेल्दै आएका धराने जनतालाई खानेपानीको दीर्घकालीन व्यवस्था गर्नुपर्ने भन्दै उनी दबाब दिन रित्तो गाग्री बोकेर सोमबार काठमाडौं आएका थिए ।

उनले आजै प्रधानमन्त्री केपी शर्मा ओलीलाई भेट्ने कार्यक्रम रहेको छ ।

काठमाडौं । धरान उपमहानगरपालिकाका मेयर हर्क साम्पाङले रित्तो गाग्रीसहित सिंहदरबार प्रवेश गर्ने चुनौती दिएपछि सिंहदरबारको सुरक्षा व्यवस्था कडा पारिएको छ ।

सरकारले धरानको खानेपानी समस्यालाई बेवास्ता गरेको गरेको भन्दै हर्क साम्पाङ खालि गाग्री लिएर हिजो काठमाडौँ आएका थिए ।

मेयर साम्पाङले रित्तो गाग्रीसहित खानेपानीमन्त्री प्रदीप यादव र प्रधानमन्त्री केपी शर्मा ओलीलाई भेट्ने बताएपछि सिंहदरबारको पूर्वी र दक्षिणी गेटमा बाक्लो संख्यामा प्रहरी तैनाथ गरिएको हो ।

रित्तो गाग्री वा अन्य कुनै विरोधका सामग्रीसहित साम्पाङलाई सिंहदरबारमा प्रवेश गर्न नदिने प्रहरीको तयारी छ ।

काठमाडौँ । नेपाल पत्रकार महासङ्घले सुनसरीस्थित धरान उपमहानगरपालिकाका प्रमुख हर्क साम्पाङले सामाजिक सञ्जालमार्फत सञ्चारकर्मीलाई धम्की दिएको विषयमा आफ्नो ध्यानाकर्षण भएको जनाएको छ ।

धरानका प्रमुख साम्पाङले नेपाल पत्रकार महासङ्घ सुनसरीका अध्यक्ष जनकऋषि राई र महासङ्घका राष्ट्रिय परिषद् सदस्य गोपाल दाहाललाई समाचारको विषयलाई लिएर धम्की दिनुभएको थियो ।

“समाचारप्रति चित्त नबुझे त्यसउपर कानुनी प्रक्रिया जाने वा प्रेस काउन्सिल नेपालमा उजुरी गर्न सकिने स्थापित प्रावधान छ । यसलाई बेवास्ता गर्दै सार्वजनिक पदधारी प्रमुखजस्तो जिम्मेवार व्यक्तिबाट गरिएको यो हर्कत अन्यन्त निन्दनीय हुनुका सार्थै प्रेस स्वतन्त्रतामाथिको ज्यादती हो”, महासङ्घका महासचिव रोसन पुरीले जारी गरेको विज्ञप्तिमा भनिएको छ ।

प्रमुख साम्पाङको उक्त शैलीले पत्रकारलाई पेसाप्रति हतोत्साहित र त्रसित बनाउनुका साथै विचार र अभिव्यक्ति स्वतन्त्रताको अधिकारमा समेत आघात पुग्ने महासङ्घको ठहर छ । महासङ्घले प्रेसको संवैधानिक अधिकारको सम्मान गर्न र यस किसिमका घटना दोहोरिन नदिने वातावरण निर्माण गर्न सम्बन्धित निकायसँग माग समेत गरेको छ ।

काठमाडौं । वडाध्यक्षलाई कार्यवाहकको जिम्मेवारी दिएर स–परिवार बेलायत पुगेका धरान उपमहानगरपालिकाका प्रमुख हर्क साम्पाङले अदालतको आदेशलाई समेत चुनौती दिएका छन् ।

साम्पाङले आज फेसबुकमा स्टाटस र भिडिओमा आफूलाई अदालतले नभई जनताले मेयर बनाएको बताएका हुन् । कसलाई कार्यवाहक दिने या नदिने सबै अधिकार आफूमा हुने भन्दै साम्पाङले रडाको नमच्चाउनू भन्दै चेतावनीसमेत दिएका छन् ।

उच्च अदालत विराटनगरले वडा नम्बर ११ का अध्यक्ष लोकेन्द्र फागोलाई कावा दिने साम्पाङको निर्णय कार्यान्वयन नगर्न अन्तरिम आदेश दिइसकेको छ ।

आफूले नागरिकको मताधिकारका आधारमा वडाअध्यक्षलाई कार्यवाहकको जिम्मेवारी दिएको साम्पाङको जिकिर छ । उनले भनेका छन्– ‘मैले जसलाई अधिकार दिएको छु उही कार्यवाहक हो । केही हल्ला नगर । मलाई कुनै अदालतले चुनेको होइन ! लोकतन्त्रमा सार्वभौम नेपाली नागरिकको शासन गर्ने अधिकार मताधिकारले चुनेको हो ! म ५ वर्षसम्म धरानको प्रमुख हुँ जुन जनताले बनाउनुभएको हो ! मैले नागरिकले दिएको अधिकार दिएर ११ नं को अध्यक्षलाई कार्यवाहक छोडेको छु ! मैले जसलाई अधिकार दिएँ उही हो कार्यवाहक ! केही हल्ला नगर !’

उनले अगाडि लेखेका छन्– ‘मुख छाड्नु नपरोस् ! धरानको विकासका लागि म दुई दिन यूके आउँदा बद्नाम गर्दै नबस है ।’

Video | Facebook