काठमाडौं: नेपाल हज समितिले आगामी वर्ष सन् २०२४ का लागि साउदी अरबको मक्का मदिनामा हज गर्न चाहने नेपाली इस्लाम समुदायका लागि आवेदन माग गरेको छ ।

साउदी अरबले आगामी वर्षका लागि १२०० जनालाई हजका लागि कोटा तोकेको समितिले जनाएको छ ।

समितिले हजमा सहभागी हुने व्यक्तिले पहिलो किस्ता बापत रु. १ लाख ५० हजार यही साउन ३० गतेदेखि असोज ३० गतेभित्र बुझाएर आवेदन दिन सक्ने बताएको छ ।

हजयात्रीले आवेदनका साथ नेपाली नागरिकताको फोटोकपी, राहदानीको फोटोकपी, हज शुल्क तिरेको रसिद, हालसालै खिचेको पासपोर्ट साइजको फोटो, कोभिड१९ विरुद्धको खोप लगाएको प्रमाणपत्र दिनुपर्ने समितिका कार्यवाहक अध्यक्ष मकवुल मियाँले बताउनु भएको छ ।

काठमाडौं । साउदी अरेबियाको मक्का मदिनामा हज गर्न जाने मुस्लिम समुदायको पहिलो समूह आज त्यसतर्फ प्रस्थान गर्दैछ ।

उपप्रधानमन्त्री एवं गृहमन्त्री नारायणकाजी श्रेष्ठले दुई सय ६८ जनालाई राति १० बजे त्रिभुवन अन्तर्राष्ट्रिय विमानस्थलबाट बिदाइ गर्ने कार्यक्रम रहेको उहाँको सचिवालयले जनाएको छ ।

मुस्लिम जनसङ्ख्याको शून्य दशमलव ०१ प्रतिशतलाई प्रत्येक वर्ष हज गर्न जाने कोटा सुविधा छ । विभिन्न समूह गरी २४ गतेसम्ममा यस वर्षका झण्डै एक हजार एक सय ८० हजयात्री साउदी अरेबिया पुग्ने गृहमन्त्रालयले जनाएको छ । उहाँहरू ४५ दिनसम्मको हजपछि स्वदेश फर्किनुहुनेछ । नेपालमा मुस्लिमको जनसङ्ख्या १२ लाखको हाराहारीमा रहेको जनाइएको छ ।

नेपाल हज समिति, सचिवालयका सदस्यसचिव एवं गृह मन्त्रालयका उपसचिव विश्व कुइँकेलका अनुसार हज समितिको सिफारिसका आधारमा हज यात्रीको छनोट हुने गर्दछ । रासस