पोखरा । सूर्यदर्शन सहकारी वचत पीडितहरुले राष्ट्रिय स्वतन्त्र पार्टीले आफुहरुको सङ्घर्षलाई दबाउन खोजेको बताएका छन् ।

बुधवार पोखरामा सञ्चारकर्मीहरुसँग कुराकानी गर्दै सूर्यदर्शन सहकारी वचत पीडितहरुले राष्ट्रिय स्वतन्त्र पार्टीले आफूहरुको सङ्घर्षलाई दबाउन खोजेको बताएका हुन् । आफूहरु सहकारीको वचत रकम फिर्ताको मागसहित आन्दोलित भएको भन्दै उनीहरुले रास्वपाले समेत सोही नारा बोकेर पीडितहरुको भावनामाथि खेलवाड गरेको आरोप लगाएका छन् ।

सञ्चारकर्मीहरुसँग कुराकानी गर्दै सूर्यदर्शन सहकारी संस्थाका वचत पीडित गोकर्ण बरुवालले आफूहरु वचत रकम फिर्ताको मागसहित आन्दोलित भएको बताउनु भयो । उहाँले रास्वपाले आफ्नो राजनीतिक स्वार्थपूर्तिका लागि सहकारी पीडितको आवाज बोलेजस्तो गरेको आरोप लगाउनु भयो ।

उहाँले भन्नुभयो – ‘वचत पीडितहरु वचत फिर्ताको माग गरी आन्दोलित भएको हो । वचत रकम फिर्ताको लागि आन्दोलन गर्दा दबाउनुपर्ने के छ ? आन्दोलनलाई दबाउँदाखेरी उहाँहरुको राजनीतिक नारा बलियो हुने हो ? उहाँहरुको राजनीतिक स्वार्थ पूरा गर्ने हो ? हाम्रो राजनीतिक स्वार्थको अभियान होइन । हामी सबै राजनीतिक विचारधाराहरुको संयुक्त रुपमा रहेका साथीहरुको वचत रकम फिर्ता गर्ने अभियान मात्र हो ।

रास्वपाले पनि हाम्रो नारा बोकेर आएको छ । तर उहाँहरुको नारा र हाम्रो वचतकर्ता साथीहरुको नाराको भावनामा फरक छ । उहाँहरु हाम्रो भावनामाथि खेलवाड गर्न चाहनुहुन्छ । हामीहरु कसैको पनि भावनामा खेलवाड नगरिकन रकम फिर्तासँग मात्र सम्बन्धित छ ।’

सूर्यदर्शन वचत पीडित संघर्ष समितिका अध्यक्ष किरण श्रेष्ठले आफूहरु कुनै राजनीति पार्टीसँग सम्बन्धित नभएको भन्दै आफूहरुले वचत फिर्ताको माग राखेर आन्दोलन गरिरहेको बताउनु भयो । उहाँले आफूहरुको वचत छिटोभन्दा छिटो फिर्ता गराउन सरकारसँग माग गर्नुभयो ।

उहाँले भन्नुभयो – ‘सहकारीमा प्रतिवादी कायम भएर अनुसन्धान गर्ने विषयमा रवि लामिछानेलाई प्रक्राउ गरेर जब कास्की ल्याइयो । पोखरामा जुन प्रदर्शन गरिएको छ, यो समय र सन्दर्भ नमिलेको भन्ने हाम्रो बुझाई छ । यो संघर्ष र प्रदर्शन कुनै औचित्य नभएको भन्ने हाम्रो ठम्याइ छ । हामी कुनै राजनीतिक पार्टीसँग आवद्ध छैनौँ । हामी नितान्त हाम्रो वचत फिर्ता होस् भन्ने विषयमा मात्रै केन्द्रित छौँ । सरकारले हाम्रो वचत छिटोभन्दा छिटो फिर्ता गराओस् ।’

सूर्यदर्शन सहकारी वचत पीडित सङ्घर्ष समितिका सचिव दुर्गानाथ न्यौपानेले पक्राउ पर्न बाँकी रहेका सहकारी ठगहरुलाई तुरुन्त पक्राउ गर्न माग गर्नुभयो । उहाँले उनीहरुको सम्पत्ति लिलामी गरेर वचत फिर्ता गराउनका लागि आफूहरुले सरकारलाई दबाब दिइरहेको बताउनु भयो ।

उहाँले भन्नुभयो – ‘हाम्रो माग सम्पूर्ण अपराधि, ठगहरुलाई पक्राउ गर्नुपर्यो । पक्राउ गर्न बाँकी ठगहरुलाई छिटोभन्दा छिटो सरकारले पक्राउ गर्नुप¥यो । अनि हाम्रो वचत पीडितहरुको रकम जसरी पनि फिर्ता गर्नुप¥यो । उनीहरुको जग्गा, जमिन लिलामी गरेर भएपनि वचत फिर्ता गर्न शुरु गर्नुपर्यो । हाम्रो दबाब त्यो हो ।’

त्यसैगरी सूर्यदर्शन सहकारी वचत पीडित प्रेमप्रसाद रेग्मीले बाहिरी जिल्लाबाट पोखरामा आएका रास्वपाका कार्यकर्ताले सहकारी पीडितको घर–घरमा पुगेर आश्वासन दिइरहेका भन्दै खेद व्यक्त गर्नुभयो । उहाँले रास्वपा कार्यकर्ताले आफ्नो सभापति अनुसन्धानमा तानिएपछि मात्रै सहकारी पीडितको न्यायको लागि बोलेर आफूहरुको सङ्घर्षलाई अन्तै मोड्ने काम गरिएको बताउनु भयो ।

उहाँले भन्नुभयो – ‘रास्वपाका व्यक्तिहरु बाहिरी जिल्लाबाट आएर पीडितलाई आश्वासन दिने, संघर्षलाई अन्त मोड्ने काम गर्नुभएको छ । त्यो गलत छ । रास्वपा सभापति अनुसन्धानमा तानिएपछि मात्र उहाँहरुले सहककारी पीडितलाई न्याय दे भन्नु खेदजनक छ । कानूनले के भन्छ त्यता सहयोग गर्नुस् ।’

उहाँले कानूनअनुरुप सहयोग गर्न रास्वपा कार्यकर्ताहरुलाई आग्रह गर्नुभयो ।