काठमाडौं । आइसिसी विश्वकप सुपर लिगमा कमजोर प्रदर्शनपछि वेस्टइन्डिज र श्रीलंकाको सोझै विश्वकप खेल्ने सम्भावना कम रहेको छ ।  विश्वकप विजेतासमेत रहेका यी दुई टोली आगमी जुन जुलाईमा जिम्बावेमा हुने विश्वकप छनोट खेल्ने सम्भावना उच्च बनेको छ ।

सुपर लिगमा १२ टेस्ट टोलीसँगै नेदरल्यान्ड्स गरि कुल १३ देशले प्रतिस्पर्धा गरेका छन् । जसबाट शीर्ष आठ टोली सोझै विश्वकपमा पुग्नेछन् भने अन्तिममा रहेका पाँच टोलिले विश्वकप छनोट खेल्नेछन् । भारत, पाकिस्तान, इंग्ल्यान्ड, अष्ट्रेलिया, अफगानिस्तान, बंगलादेश र न्युजिल्यान्ड सोझै विश्वकप छनोटमा पुगेका छन् ।

अब, दक्षिण अफ्रिका, श्रीलंका र वेस्टइन्डिज मध्ये एक टोलीले सोझै विश्वकपमा स्थान बनाउनेछन् । जसमा दक्षिण अफ्रिकाको उच्च सम्भावना रहेको छ । वेस्टइन्डिज २४ खलमा ९ जित र १५ हारसहित ८८ अंकका साथ आठौं स्थानमा छ ।यस्तै, श्रीलंका २३ खेलमा ७ जित र १३ हारसहित ८२ अंकका साथ नवौं स्थानमा छ भने दक्षिण अफ्रिका १९ खेलमा ७ मा जित र १० मा हारसहित १० औं स्थानमा छ ।

दक्षिण अफ्रिकाले नेदरल्यान्ड्ससँग अन्तिम दुई खेल खेल्न बाँकी छ । दक्षिण अफ्रिका दुबै खेलमा विजयी भए ९८ अंकसहित शीर्ष आठमा रहेर विश्वकपमा स्थान बनाउनेछ ।

यता, श्रीलंकाले अन्तिम खेल न्युजिल्यान्डसँग खेल्नेछ । उक्त खेलमा विजयी हुँदा श्रीलंकाको ९२ अंक हुनेछ । श्रीलंका विश्वकप खेल्न उक्त खेल जित्नुको साथै दक्षिण अफ्रिकाले कम्तिमा एक खेल हार्नुपर्ने हुन्छ ।

वेस्टइन्डिज विश्वकपमा पुग्न भने श्रीलंका र दक्षिण अफ्रिकाले बाँकी सबै खेल हार्नुपर्ने हुन्छ । वेस्टइन्डिजले दुई पटकको विश्वकप जितेको छ भने श्रीलंकाले एक पटक उपाधि हात पारेको छ ।

यससँगै, वेस्टइन्डिज र श्रीलंकाले विश्वकप छनोट खेल्ने सम्भावना उच्च देखिन्छ । विश्वकप छनोट आगमी जुन १८ देखि जुलाई ९ सम्म जिम्बावेमा हुनेछ । जसमा आइसिसी विश्वकप लिग–२ का शीर्ष तीन टोली, विश्वकप सुपर लिगबाट पुछारका पाँच टोली र विश्वकप क्वालिफायर प्लेअफबाट दुई टोलीले प्रतिष्प्रधा गर्नेछन् ।

सुपर लिगबाट जिम्बावे, नेदरल्यान्ड्स र आयरल्यान्डले विश्वकप छनोट खेल्ने पक्का भईसकेको छ । लिग–२ बाट पनि स्कटल्यान्ड, ओमन र नेपाल गईसकेको छ ।