काठमाडौँ । प्रतिनिधिसभाको बैठकमा सांसद खुश्बु ओलीले आफूलाई ज्यान मार्ने धम्की आएको विषय उठाएपछि नवनियुक्त गृहमन्त्री सुदन गुरुङले घटनाबारे आवश्यक अनुसन्धान गरी कानुनी कारबाही प्रक्रिया अघि बढाइने आश्वासन दिएका छन्।

बैठकपछि गृहमन्त्री गुरुङले सांसद ओलीलाई भेटेर धम्की सम्बन्धी विषयलाई गम्भीरतापूर्वक लिइएको बताउँदै आवश्यक कानुनी प्रक्रिया अगाडि बढाइने जानकारी दिएका हुन्।

उनले घटनाको यथार्थ छानबिन गरी दोषीमाथि कानुनअनुसार कारबाही गरिने उल्लेख गर्दै त्यसका लागि सम्बन्धित प्रक्रिया पूरा गर्न सांसद ओलीलाई आग्रह गरेका छन्।

सांसद ओलीले प्रतिनिधिसभा बैठकमा आफूलाई ज्यान मार्ने धम्की आएको भन्दै सरकारको ध्यानाकर्षण गराएकी थिइन्। त्यसपछि गृहमन्त्री गुरुङले घटनाको अनुसन्धान गरी आवश्यक कदम चाल्ने प्रतिबद्धता व्यक्त गरेका हुन्।