काठमाडौं । वरिष्ठ नेत्र विशेषज्ञ तथा सामुदायिक स्वास्थ्य सेवामा सक्रिय डा. सन्दुक रूईतले आफू कुनै पनि राजनीतिक पद वा नेतृत्वको प्रतिस्पर्धामा नजाने स्पष्ट पारेका छन् ।

भदौ २३ र २४ मा जेनजी समूहले राजनीतिक अव्यवस्था र भ्रष्टाचारविरुद्ध गरेको प्रदर्शनका क्रममा मृत्यु भएका व्यक्तिहरूप्रति श्रद्धाञ्जली व्यक्त गर्दै उनले विज्ञप्ति जारी गर्दै यस्तो बताएका हुन् ।

रूईतले प्रदर्शनमा घाइते भएकाहरूको शीघ्र स्वास्थ्यलाभको कामना गर्दै भनेका छन्, “लामो चिकित्सकीय यात्रामा मलाई तह र तप्का सबै तहका नेपालीले साथ दिनुभयो, मलाई भोलिका दिनमा पनि त्यो साथ, सद्भाव र माया प्राप्त हुन्छ भन्नेमा कुनै द्विविधा छैन ।”

उक्त विज्ञप्तिमा उनले अन्धोपन निवारणलाई आफ्नो जीवनको मुख्य साधना बताउँदै लेखेका छन्, “मलाई हरेक राजनीतिक उतारचढावपछि कुनै न कुनै पदमा बसेर नेतृत्व गर्नुपर्ने अनुरोध आउने गरेको छ । तर, म स्पष्ट छु— मेरो कर्म भनेको नेपाली र संसारभरका विरामीको सेवामा आफ्नो सीप, ज्ञान र समय दिनु हो । नेपाल र नेपालीको नाम संसारभर पुर्याउनु हो । मेरो हृदय सफा छ, म यसमा खुशी छु ।”

रूईतले सबैलाई आफ्नो पेशा र कर्ममा इमान्दारीपूर्वक लागेर देशमा सकारात्मक परिवर्तन ल्याउन आग्रह गरेका छन्।

“अबको समय भनेको सबै जुटेर देश बनाउने हो,” विज्ञप्तिको अन्त्यमा उनले भनेका छन् ।

डा. सन्दुक रूईत विगत तीन दशकदेखि आँखासम्बन्धी स्वास्थ्य क्षेत्रमा सेवा दिँदै आएका छन् । उनी सस्तो र सरल प्रविधिबाट मोतियाबिन्दु उपचारको प्रभावकारी विधि विकास गरी विश्वभर परिचित छन् ।