भक्तपुर। भक्तपुर नगरपालिकाले प्रकाशन गरेको ‘सञ्चार माध्यममा भक्तपुर नपा–भाग २’ पुस्तक आज विमोचन गरेको छ ।

आज भक्तपुर नगरपालिकाले यहाँ आयोजना गरेको पुस्तक सार्वजनिक कार्यक्रममा नेपाल मजदुर किसान पार्टीका सचिव प्रेम सुवालले ‘सञ्चारमाध्यममा भक्तपुर नपा–भाग २’ पुस्तक विमोचन गर्नुभएको हो ।

पुस्तकमा राष्ट्रिय समाचार समिति (रासस)लगायत विभिन्न सञ्चारमाध्यमले भक्तपुर नगरपालिकाबारे प्रकाशित गरेको विभिन्न समाचारको सँगालो रहेको छ । सचिव सुवालले आत्मप्रशंसाभन्दा रचनात्मक आलोचनाले सुधार गर्ने अवसर प्रदान गर्ने उल्लेख गर्दै पुस्तकमा पत्रकारको दृष्टिकोणबाट भक्तपुरका विविध विषय समेटिनु आफैँमा भक्तपुरका लागि सकारात्मक पक्ष भएको बताउनुभयो ।

भक्तपुरको ऐतिहासिक, सांस्कृतिक र पुरातात्विक सम्पदाको संरक्षण तथा व्यवस्थापनमा विशेष ध्यान दिनुपर्ने उल्लेख गर्दै उहाँले युरोपको भेटिकन सिटी जस्तै योजनाबद्ध ढङ्गले भक्तपुरको संरक्षण र विकास गर्नुपर्ने सुझाव दिनुभयो ।

सो अवसरमा भक्तपुर नगरपालिकाका प्रमुख सुनिल प्रजापतिले पुस्तकमा यहाँका पत्रकारहरूले आफू कार्यरत सञ्चारमाध्यममा प्रकाशित गरेका समाचारको सँगालो दस्तावेजीकरणका रुपमा राखेको बताउनुभयो ।

उहाँले यस वर्षको एसइई नतिजाले भक्तपुरको शैक्षिक गुणस्तरलाई थप पुष्टि गरेको बताउँदै यस वर्ष भक्तपुर नगरपालिकाभित्र सञ्चालित सामुदायिक र संस्थागत विद्यालयबाट १३ जना विद्यार्थीले ४.० जिपिए प्राप्त गरेको र सातवटा विद्यालयले शत्प्रतिशत नतिजा हासिल गरेको बताउनुभयो ।

भक्तपुर नगरपालिकाका उपप्रमुख रजनी जोशीले शैक्षिक सत्र २०८२ को माध्यमिक शिक्षा परीक्षा (एसइई) मा ४.०० जिपिए प्राप्त गरी उत्कृष्ट नतिजा हासिल गरेका ११ जना विद्यार्थीलाई सम्मान गरिएको बताउनुभयो ।

पुस्तकमाथि भक्तपुर नगरपालिका–५ का वडाअध्यक्ष योगेन्द्रमान बिजुक्छें, प्रमुख प्रशासकीय अधिकृत वसन्त भट्टराई र भक्तपुर मासिकका सम्पादक लक्ष्मणराज जोशीले पुस्तकबारे समीक्षा प्रस्तुत गर्नुभयो । रासस