काठमाडौं ।  राष्ट्रिय स्वतन्त्र पार्टी (रास्वपा) का संस्थापक तथा पूर्व महामन्त्री डा. मुकुल ढकालले पार्टीको प्रथम ऐतिहासिक महाधिवेशनका अवसरमा प्रतिनिधिहरूलाई व्यक्ति, गुट र पदभन्दा विचार, संस्था र उद्देश्यलाई प्राथमिकता दिन आग्रह गरेका छन्।

सामाजिक सञ्जालमार्फत आफ्नो धारणा सार्वजनिक गर्दै ढकालले पार्टी स्थापना भएको पाँचौँ वर्ष प्रवेश गरेको तथा चौँथो वार्षिक उत्सव मनाइरहेको सन्दर्भमा शुभकामना व्यक्त गरेका छन्। उनले ठीक चार वर्षअघि आजकै दिन रास्वपा स्थापना गरिएको स्मरण गर्दै सुरुआती दिनमा पार्टी दर्ताका लागि आवश्यक ५०० नागरिकता संकलन गर्नसमेत संघर्ष गर्नुपरेको उल्लेख गरेका छन्।

ढकालले छोटो समयमै पार्टी दुई तिहाइ जनमतसहित सरकारमा पुग्न सफल भएको भन्दै प्रारम्भिक संघर्षका दिनहरू पार्टीसँग जोडिएका सबै व्यक्तिको स्मृतिमा सधैँ जीवन्त रहने बताएका छन्।

प्रथम महाधिवेशन सुरु भइरहँदा आफू निम्तो सूचीमा समेत नरहेको उल्लेख गर्दै उनले भनेका छन्, “विडम्बना, पार्टीलाई ‘Fuc*’ लेख्ने व्यक्ति प्रधानमन्त्री बनिसक्दा, पार्टी स्थापना गर्ने म भने महाधिवेशनको निम्तो सूचीमा समेत परिनँ।”

उनले आफू महाधिवेशन स्थल चितवनमा उपस्थित नभए पनि त्यसलाई ठूलो विषय नमान्न आग्रह गरेका छन्। राजनीतिमा व्यक्तिको भौतिक उपस्थितिभन्दा उसका विचार, मूल्य र सिद्धान्तको प्रभाव महत्वपूर्ण हुने उनको भनाइ छ।

“यदि मेरो एक मत नहुँदा पार्टीले सही दिशा निर्धारण गर्न नसक्ने हो भने म दुःखी हुने थिएँ। तर महाधिवेशनले सही कार्यदिशा, सही विचार र सही निर्णय गर्छ भने मेरो मत पनि त्यही निर्णयमा रहने थियो,” उनले लेखेका छन्।

ढकालले महाधिवेशन केवल पद बाँडफाँड वा व्यक्ति चयनको कार्यक्रममा सीमित नहोस् भन्ने अपेक्षा व्यक्त गरेका छन्। को कुन पदमा विजयी वा पराजित भयो भन्नेभन्दा पार्टीले कुन राजनीतिक दिशा रोज्छ भन्ने विषय महत्वपूर्ण रहेको उनको धारणा छ।

उनले राजनीति र “राजव्यक्ति” बीचको भिन्नता स्पष्ट गर्दै राज्य सञ्चालनका नीति, सिद्धान्त, विचार र कार्यदिशामाथिको बहस नै वास्तविक राजनीति भएको बताएका छन्।

प्रतिनिधिहरूलाई सम्बोधन गर्दै उनले भनेका छन्, “व्यक्तिभन्दा विचारलाई, गुटभन्दा संस्थालाई, र पदभन्दा उद्देश्यलाई माथि राखेर निर्णय गर्नुहोस्। ‘राजव्यक्ति’ नगर्नुहोस्, ‘राजनीति’ गर्नुहोस्।”